Халаан уутуттан эмсэҕэлээбит дьоҥҥо көмө харчыны хомуйарга СӨ Общественнай балаатата уонна «Саха» НКИК «Бары аан дойдунан көмөлөөн» диэн ыам ыйын 31 күнүгэр телерадиомарафон тэрийэн ыыталлар.
«Саха» НКИК бырагыраамаҕа дириэктэрэ Ньургун Торговкин: «Сахарадиотыгар» радиомарафон сарсыарда 7 чаастан күнүс 14 чааска диэри ыытыллыаҕа. Онтон 14 чаастан киэһэ 20.30 чааска диэри үс телеканалынан «Саха» НКИК, «Якутия24», «Мамонт» телерадиомарафон бэриллиэҕэ. Онно туох буола турара радиоҕа эмиэ холбонуоҕа. Студияҕа араас идэлээх ыалдьыттар кэлэн кэпсиэхтэрэ, бэйэлэрин үтүө санааларын тиэрдиэхтэрэ», — диэн эттэ.
edersaas.ru
Ленин болуоссатыгар ыам ыйын 31 күнүгэр сарсыарда 8 ч. киэһэ 20 ч. 00 диэри биэс бэлэмнэммит уурунаҕа ким баҕарар кэлэн харчы угуон, сааскы халаан уутуттан дьиэлэрэ-уоттара ууга барбыт дьоҥҥо көмөлөһүөн сөп. Ону таһынан, 14 ч. аһымал санаа кэнсиэрэ куорат олохтоохторун, ыалдьаттарын ыҥырар. Ол кэнсиэр 15 ч. 17 ч. диэри ити үс телеканалынан көстүөҕэ.
Суотабай төлөпүөнтэн 3434 кылгас нүөмэргэ ПАВОДОК диэн SMS суруйаҕыт уонна тэйэ түһэн баран төһө харчыны ыытаргытын суруйдаххытына, эһиги көмө харчыгыт бүтүн өрөспүүбүлүкэ үрдүнэн мунньуллан, кыһалҕалаах дьоҥҥо тиийиэҕэ.
Киирбит харчыны счетнай хамыыһыйа ааҕан, СӨ нэһилиэнньэтин олоҕо-дьаһаҕа куттала суох буолуутун хааччыйар судаарыстыбаннай кэмитиэт улуустарынан тыырыаҕа.
Марианна Тыртыкова, “Саха сирэ”, edersaas.ru