Муус устар 4 күнүгэр өрөспүүбүлүкэтээҕи пресс-кииҥҥэ Саха сиригэр телемедицина уонна инновация сайдыыларыгар аналлаах пресс-конференция ыытылынна.
Надежда ЕГОРОВА, «Саха сирэ» хаһыат, edersaas.ru
Пресс-конференцияҕа СӨ судаарыстыбаннай сүбэһитэ Михаил Николаев, СӨ доруобуйа харыстабылын миниистирэ Михаил Охлопков, миниистири солбуйааччы Людмила Вербицкая, м.н.к., «Весттрэйд Лтд» фирма генеральнай дириэктэрэ Владимир Беляков, Радиокомпания «Вектор», САУо генеральнай дириэктэрэ, т.н.д, профессор Виктор Классен уонна национальнай куттал суох буолуутун кыһалҕаларын үөрэтэр академия академига, СӨ Судаарыстыбаннай сүбэһитэ Владимир Томскай кытыннылар.
Миниистир Михаил Охлопков телемедицина сайдыытын кытары сибээстээх сүрүн кыһалҕаларга тохтоото. Ол курдук, телемедицинаҕа сокуон базата суоҕа, улуустар бары оптоволокнаҕа кыайан холбоммотторо (чуолаан хотугу уонна Арктика улуустара), телемедицина стандартыгар сөп түбэһэр бырагырааманан хааччыйыы суоҕа уо.д.а. телемедицина сайдыытын атахтыыллар.
«Саха сиригэр телемедицинанан дьарыктаммыппыт 20-чэ сыл буолла. Онуоха биһиги исписэлиистэрбит үчүгэй акылааты уурары ситиспиттэрэ», – диэн Михаил Николаев быйыл тэриллибитэ 25 сылын бэлиэтиир Медицина национальнай киинин ситиһиилэрин, саҥа технологиялары киллэриини саҕалаабыт үтүө кэмнэри ахтан-санаан ааста.
Виктор Классен телемедицинаҕа сокуон бырайыагын олоххо киллэрэргэ Саха сиригэр иһитиннэрэр-биллэрэр технологиялар сайдыыларыгар саҥалыы көрүү наадатын ыйда.
«Биһиги икки күн устата эһиги медицинскэй объектаргытын көрдүбүт-иһиттибит. Тиксиини кытары ыытыллыбыт телеконференция куһаҕана суохтук барда. Биллэн турар, Татарстаны кытары тэҥнээн көрдүм. Биһиэхэ доруобуйа харыстабылын салаатыгар сибээскэ сыһыаннаах кыһалҕалар суохтар.
…Эһиги сиргит-уоккут айылҕатын уратыларын учуоттуохха наада. Оптоволокно кыайан тиийбэт сиригэр сибээс аргыстарын олохтуохха сөп, ити кыһалҕалары быһаарар биир көрүҥ дии саныыбын», – диэн сүбэлээтэ.
Владимир Беляков оҕону искусственнайдык үөскэтии (ЭКО) боппуруостарыгар тохтоото. Оҕо үөскээбэт кыһалҕатын быһаарарга тутта сылдьар туһалаах прибордарын билиһиннэрдэ. Отут сыл анараа өттүттэн ыла туһаныллар буолбут ЭКО көмөтүнэн билигин 1 мөлүйүөнтэн тахса оҕо төрөөн-ууһаан, номнуо бэйэлэрэ ыал ийэлэрэ-аҕалара буолан олороллор.
«Биһиги виртуальнай поликлиникалар боруоктарыгар турабыт. Онуоха олохтоох медицина саҥа кыахтарын арыйан, кыраныыссабытын кэҥэтиэхтээхпит. Оччоҕо эмчиттэр улуустарга олорор ыарыһахтарга барыларыгар биир тэҥ медицинскэй көмөнү оҥорор кыахтаныахтара», – диэн Михаил Николаев кэлбит исписэлиистэр Саха сиригэр саҥа медицинаны сайыннарарга, үрдүк технологияны киллэргэ көмөлөһөллөрүгэр эрэнэрин биллэрдэ.
ЫСПЫРААПКА:
Телемедицина туһунан Арассыыйаҕа бэлэмнэнэ сылдьар сокуон барыла быраастар уонна ыарыһахтар олохторун өссө тупсарыахтаах. Биллэрин курдук, онлайн-иһитиннэрии көмөтүнэн быраастар ыарыһахтарын туругун, эпэрээссийэ хаамыытын уо.д.а. наадалаах иһитиннэриини ылаллар. Телемедицина чуолаан Саха сирин ыраах сытар нэһилиэнньэлээх пууннарыгар туһалаах буолуоҕа саарбаҕа суох.
Надежда ЕГОРОВА, «Саха сирэ» хаһыат, edersaas.ru