Горнай улууһун Кировскай нэһилиэгэр быраас саҥа амбулаторията аһылынна. edersaas.ru
Саҥа балыыһа уоттан-күөстэн куттала суох матырыйаалларынан тутуллубут, сылааһынан бэйэлэрэ хааччыналлар. Кылаабынайа, телемедицина туочукалаах. Саҥа дьиэ «Үтүө санаалаах доруобуйа харыстабыла» бырагыраамаҕа толору эппиэттиирэ ыраах сытар нэһилиэккэ абыраллаах буолуоҕа.
Амбулатория бырааһа Зинаида Ивановна:
«Билигин биһиги Дьокуускай куорат сүрүннүүр клиникаларын «узкай» идэлээх быраастарыттан онлайн-режиминэн суһал сүбэни-аманы ылыахпыт. Аныгы технологиялар ыарыыны чопчу быһаарарга, эмтээһини кэмигэр саҕалыырга уонна, наада буоллаҕына, суһал ыарыһаҕы киин балыыһаларга тириэрдэргэ көмөлөһүөхтэрэ. Эбиитин ХИФУ мединститутун уонна бэл, дойду сүрүн үөрэҕин кыһаларын профессордарын видео-уруоктарыгар кыттар кыахтаныахпыт», – диэн эмчиттэр эбии үөрэнэриэхтэрин, сайдыахтарын тоһоҕолоон бэлиэтээтэ.
Олохтоохтор СӨ Доруобуйа харыстабылын министиэристибэтигэр, улуус дьаһалтатыгар уонна биир дойдулаахтарыгар – инвестор Василий Народовка махтаннылар. Балыыһа кэлэктиибэ бу үөрүүлээх күн СӨ Доруобуйа харыстабылын министиэристибэтиттэн 200 тыһыынча суумаҕа оргтехниканы атыылаһарга сертификаты, улуус дьаһалтатыттан, улуустааҕы уонна өрөспүүбүлүкэ балыыһаларыттан бэлэхтэри тутта.
2004 сылтан Горнай улууһун Киин балыыһатын кылаабынай бырааһынан үлэлиир Геннадий Егоров Доруобуйа харыстабылын министиэристибэтигэр уонна өрөспүүбүлүкэ салалтатыгар махтанан туран, инвестордар, бырабыыталыстыба уонна министиэристибэлэр холбоһуктаах өйөбүллэринэн улуус балыыһаларын саҥардыыга үлэ салҕаныаҕар эрэнэрин биллэрдэ.
ЫСПЫРААПКА:
Кылгас кэм иһигэр Горнай улууһугар 3 таас балыыһа баар буолла. Ол иһигэр, икки балыыһа судаарыстыбаннай-чааһынай бииргэ үлэлэлээһин көмөтүнэн тутулунна.
Надежда ЕГОРОВА, «Саха сирэ» хаһыат, edersaas.ru