Роскомнадзор иһитиннэрбитинэн, «Telegram» мессенджер хааччахтаммыт. Муус устар 13 күнүгэр Москватааҕы Таганскай суут быһаарыытынан, 2013 с. Павел Дуров киллэрбит мессенджерэ Арассыыйа үрдүнэн бобулунна. Бу хааччах туһанааччылар кэпсэтиилэрин ис хоһоонун арыйар декодирование оҥоһуллуор диэри туттуллуо. Маннык ирдэбил үрдүкү былаас үлэһиттэриттэн кэлбит.
Онон судаарыстыбаннай тэрилтэлэр уонна хампаанньалар «Telegram»-тан атын мессенджергэ көһөн эрэллэр.
Павел Дуров: «Блокировканы атын сиринэн эргийэр ньыманы туттуохпут, ол иһин бастакы кэмҥэ VPN- уонна Proxy-сервистар үлэлэрэ бытаан буолуо”, — диэн сэрэттэ.
Ити курдук, интэриниэккэ киирэн кими кытта туох туһунан суруйсубутуҥ, кэпсэппитиҥ барыта дагдайан тахсыан сөп. Онон, суруйуоҥ иннинэ сэттэтэ толкуйдаабытыҥ ордук.
Марианна ТЫРТЫКОВА, «Саха сирэ», edersaas.ru