Бүгүн, балаҕан ыйын 29 күнүгэр, Сүрэх аан дойдутааҕы күнэ бэлиэтэнэр. Ол чиэһигэр Дьокуускайга телебашня кыһыл өҥүнэн умайыаҕа.
Биир чаас устата, киэһэ 8 чаастан 9-ка диэри телебашня кыһыл өҥүнэн күндээрэ умайан туруоҕа.
Сүрэх аан дойдутааҕы күнүн бэлиэтиир туһунан кардиологтар 2012 сылтан туруорсубуттара. Онно соһутар-сөхтөрөр сыыппаралары ааттаабыттара. Аан дойду үрдүнэн сыллата сүрэх-тымыр ыарыыларыттан 18 мөлүйүөнтэн тахса киһи өлөр. Бу өлүү уопсай ахсааныттан бастакы миэстэҕэ турар.
Онон Сүрэх аан дойдутааҕы федерациятын көҕүлээһининэн, анал күнү бэлиэтээн, дьон бэйэтин доруобуйатын уонна баар-суох мотуорун – сүрэҕин харыстыырын санатар буолбуттара. Аан дойдутааҕы доруобуйа харыстабылын тэрилтэтэ (ВОЗ) уонна ЮНЕСКО бу көҕүлээһини өйөөбүттэрэ. Бүгүн Сүрэх күнэ 100-тэн тахса дойдуга бэлиэтэнэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru