Арассыыйа күнүгэр киин куорат телебашнята дойду былааҕын үс өҥүнэн күлүмүрдүү умайыаҕа. Онон бу судаарыстыбаннай бырааһынньык биир бэлиэтинэн буолуоҕа.
Телебашняны былырыын кулун тутар 15 күнүгэр уотунан-күөһүнэн сандаардыбыттара. Манна 134 прожектор уонна “светодиоднай LED” лаампалары холбууллар. Онон хайдах баҕарар өҥнөөх буолуон сөп. Башня устатын тухары сэттэ кэрчиккэ арааран, араас өҥүнэн күлүмүрдэтэ уматаллар. Онон өҥнөрө тырымныахтарын да сөп, сыыйа уларыйан, чыпчыҥныахтарын, күүскэ сандаарыахтарын да сөп. Маннык бүтүн архитектурнай-уус-уран иллюминацияны көмпүүтэринэн салайаллар.
Бэс ыйын 12 күнүгэр Арассыыйа былааҕын өҥнөрүн телебашняҕа киэһэ 10 чаастан түүн 1 чааска диэри көрүөххэ сөп. Дьокуускайга үрүҥ түүннэр туралларынан, бу кэмҥэ эрэ кыратык хараҥаран ылар. Туймаада хочотугар бүтүннүү ыраахтан ыҥыра, умайа, күлүмнүү туруоҕа. Биллэн турар, телебашня Дьокуускай куорат биир бэлиэтэ, кэрэ киэргэлэ буолбута саарбаҕа суох
Ангелина ВАСИЛЬЕВА, “Саха сирэ” хаһыат, edersaas.ru
Ыспыраапка
Телевизионнай башня 1982 сыллаахха тутуллубута. Үрдүгэ – 241,71 миэтэрэ. Бүтэһик платформата 225,8миэтэрэ үрдүккэ баар.
Үрдүгүнэн Арассыыйаҕа сэттис миэстэлээх, оттон Сибииргэ саамай үрдүк башня буолар. Ону тэҥэ, ирбэт тоҥҥо турар саамай үрдүк тутуу быһыытынан сыаналанар.
Телевышканы Тюменьтэн кэлбит, Николай Бабинцев салайааччылаах бөртөлүөт экипаһа таҥмыта. Биэс күн устата ипподромҥа тимир кэрчиктэрин сыһыартаабыттара.
