Бүтүн Арассыыйатааҕы инклюзивнай үөрэхтээһин нэдиэлэтин чэрчитинэн, Даун ыарыылаах дьон аан дойдутааҕы күннэригэр анаммыт тэрээһиннэр ыытыллыахтара. Ол курдук, аһымал аахсыйалар, информационнай флеш-мобтар буолуохтара.
Бу маннык ыалдьар оҕолору “Күн оҕолоро” диэн ааттыыллар. “Харысхал” аһымал пуондата флешмобка кыттыһан, оҕолору, кинилэр дьиэ кэргэттэрин өйүүргэ ыҥырар.
Араҕас өҥнөөх таҥаһы кэтэн, эбэтэр араҕас саарыгы тутан, лиэнтэни баанан, хаартыскаҕа түһэн баран, социальнай ситимнэргэ #солнечныйденьякт диэн хэштег туруоран угаҕыт.
“Азия” атыы-эргиэн дьиэтигэр аһымал аахсыйа ыытыллыа. “Күн оҕолорун” илиилэриттэн саарыктары тутуоххут.
Дьокуускайга телебашня кулун тутар 21 күнүгэр киэһэ 7 чаастан 8 чааска диэри аан бастаан араҕас өҥүнэн күндээр умайыаҕа.
Кулун тутар 15-21 күннэригэр “Киин” киинэ тыйаатырын улахан экраныгар оҕолор уонна артыыстар кыттыылаах роликтар көрдөрүллүөхтэрэ.
Бу тэрээһиннэр “күн оҕолорун”, дьиэ кэргэттэрин өйүүр, кинилэр кыһалҕаларыгар уопсастыба болҕомтотун туһаайар сыаллаахтар.
Ангелина Васильева, “Саха сирэ” хаһыат, edersaas.ru
Хаартыска: tctr.ru