Тэйиччиттэн поликлиника («Облачная поликлиника») телемэдиссиинэ өҥөтө сайдар, кэҥиир.
Коронавирус үгэннээбит кэмигэр, 2020 сыллаахха саҕаламмыт «Облачная поликлиника» телемэдиссиинэ өҥөтүнэн туһанан сүбэни-аманы биэрии салгыы сайдар уонна тупсар.
—Саха сиригэр «Облачная поликлиника» сыһыарыытыгар 46 мэдиссиинэ тэрилтэтэ, 981 быраас холбонон сылдьаллар. 2020 сыл бэс ыйын 1 күнүттэн 2022 сыл от ыйын 7 күнүгэр диэри кэмҥэ 33 202 сүбэ-ама оҥоһуллубут, итинтэн бэйэлэрин хааччахтанан олорор пациеннарга — 3124. Дэҥник туһанааччылар ахсааннара — 40515, — диэн этэр өрөспүүбүлүкэтээҕи мэдиссиинэ иһитиннэрэр-аналитикалыыр киинин (ЯРМИАЦ) дириэктэрэ Аида Коростелева.
Саамай сүрүнэ, киһи ыраахтан олорон быраас сүбэтин ылар. Билигин дистанционнайынан сүбэ-ама чат киэбинэн эбэтэр видеонан ыытыллар. Пациеннарга да, быраастарга да табыгастаах буоларын курдук, туох баар наадалаах барыта: пациент каартата, анаалыстар уонна чинчийиилэр түмүктэрэ бааллар.
Өҥөнү оҥоруу тупсарылла турар: оҕо саадыгар, оскуолаҕа ыспыраапка «Запрос на получение справки», «Выписка льготного рецепта на лекарства» чэпчэтиинэн туһанар дьон ылыахтарын сөп. Сыһыарыы көмөтүнэн бырааһы эбэтэр суһал көмөнү дьиэҕэ ыҥырыахха, больничнай лииһи оҥотторуохха, сыстыганнаах ыарыһаҕы кытары хантаага суоҕун туһунан ыспыраапка ылыахха сөп. Маны сэргэ доруобуйаны чөлүгэр түһэриигэ, ол иһигэр ковид кэнниттэн доруобуйаны көрүнүүгэ куурустар бааллар.
«Облачная поликлиника» тэйиччиттэн көмөнү оҥорор өҥө икки сыллаах үлэтигэр Москваҕа акселераторга кыттыыны ылбыта уонна доруобуйа харыстабылын боппуруоһугар бастыҥ быһаарыы буоларынан, «ComNews Award»бириэмийэ кыһыл көмүс призерунан, доруобуйа харыстабылыгар «Медведь.Телемед» баазаҕа ИТ-быһаарыыга эрэгийиэннэргэ боруонсаны ылбыта, «Здоровье Нации» категорияҕа «Мы вместе» норуоттар икки ардыларынааҕы бириэмийэ финалиһа.
+1
+1
+1
+1
+1
+1
+1