Cэтинньи 26 күнүгэр Госдуума пленарнай мунньаҕар тэйиччиттэн үлэ туһунан сокуон барылын үһүс ааҕыытыгар ылынна. Бу сокуон тохсунньу 1 күнүттэн үлэҕэ киириэхтээх.
Бу сокуоҥҥа Саха сириттэн үлэ, социальнай сайдыы министиэристибэтэ көҕүлээн, хамнаска хотугу эбиликтэри, оройуон коэффициеннарын оннунан хаалларар туһунан этиилэри киллэрбитэ.
— Госдуума оробуочай бөлөҕө Саха сирин этиилэрин ылынна. Онон тэйиччиттэн олорон үлэлиир дьоҥҥо хамнастара намтыа суохтаах. Хамнаска хотугу эбиликтэр уонна оройуоннааҕы коэффициеннар оннунан хаалаллар. Федеральнай киин өйөөбүтэ биһиэхэ улахан суолталаах, бу өттүгэр улахан үлэни ыыттыбыт, — диэн миниистир Елена Волкова эттэ.
Ону тэҥэ, сокуоҥҥа үлэһит тус тэрилин туһанарыгар тахсыбыт ороскуотун толуйуу, үлэни биэрээччи бары ирдэнэр усулуобуйаны оҥоруутун туһунан этиилэр киирдилэр. Ол курдук, үлэни биэрээччи уот ороскуотун эмиэ толуйуохтаах.
Тэйиччиттэн үлэ бастайааннай, быстах (алта ыйтан элбэҕэ суох) уонна кэмиттэн кэмигэр буолуон сөп.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru