«Саха сирэ» технопаарка балыыһаҕа коронавируһы анаалыстыыр тэрили биэрдэ

«Саха сирэ» технопаарка биотехнологическай лабораторията 3 №-дээх өрөспүүбүлүкэтээҕи балыыһаҕа коронавируһы полимеразнай цепной реакция ньыматынан (ПЦР) анаалыстыыр тэрили биэрбит.

edersaas.ru

—Бу CFX96 TouchReal-Time PCR DetectionSystem (АХШ) амплификатор көмөтүнэн SARS-CoV-2 вируһа баарын-суоҕун билэргэ биир төхтүрүйүүгэ 40-48 боруобаны анаалыстаан быһаарыахха, биир суукка устатыгар 400 боруобаны көрүөххэ сөп, – диир биотехнологическай лаборатория сэбиэдиссэйэ Владислав Алексеев.

Аан дойдутааҕы доруобуйа харыстабылын тэрилтэтэ этэринэн, ПЦР ньымата сыстыганнаах ыарыылары быһаарарга билиҥҥитэ саамай чуолкай уонна эрэллээх ньыма. Кыра да вирус баарын быһаарар буолан, киһиэхэ ыарыы саҥа саҕаланан эрэрин булар кыахтаах диэн технопаарка пресс-сулууспата иһитиннэрэр.

Раиса Сибирякова, «Саха сирэ» хаһыат, edersaas.ru