Сыллата өрөспүүбүлүкэҕэ хастыы да тыһыынча олорор дьиэ үлэҕэ киллэриллэр. Сааскы-сайыҥҥы ыйдарга чааһынай дьиэни туттуу ахсаана лаппа элбээн, ордук киин куорат олохтоохторо уоту, ититиини, гааһы киллэртэриигэ улахан харгыстары көрсөллөр. Ааһан эрэр сылга «Якутскэнерго» ПАУо кытары технологическай холбонууга уопсайа 6710 дуогабар түһэрсиллибитин туһунан туһааннаах хампаанньа технологическай холбонууга управлениетын начаалынньыга Игорь Боков иһитиннэрдэ.
Пандемиянан сибээстээн сайаапка аҕыйаата
Электричество уотугар ыллыҥ да холботторбоккун. Олорор дьиэҥ аттынан уот ситимэ ааһар да буоллаҕына, туһааннаах тэрилтэлэр сөбүлэҥнэрин ылар туһугар сүүрүөххүн-көтүөххүн, үгүс докумуону хомуйуоххун наада.
Игорь Александрович сыстыганнаах дьаҥ туруоҕуттан технологическай холбонууга сайаапка аҕыйаабытын туһунан кэпсээтэ. Холобур, 2019 сылга 7600 дуогабар түһэрсиллибит эбит буоллаҕына, 2020 сылга 6261-гэ диэри түспүт. Оттон ааһан эрэр сыл түмүгүнэн уопсайа 6935 дуогабары түһэрсэр былааннаахтар.
Сэтинньи ыйдааҕы туругунан, Киин электрическэй ситимнэр сирдэригэр-уоттарыгар, ол иһигэр Хаҥалас, Нам, Горнай, Мэҥэ Хаҥалас, Амма, Уус Маайа, Чурапчы, Таатта, Уус Алдан, Томпо улуустарыгар итиэннэ Дьокуускай куоракка 4667 технологическай холбонууга дуогабар түһэрсиллибит. Өрөспүүбүлүкэ арҕаа өттүгэр, ол иһигэр Мииринэйгэ, Ленскэйгэ, Өлүөхүмэҕэ, Сунтаарга, Ньурбаҕа, Үөһээ Бүлүүгэ, Бүлүүгэ уонна Кэбээйи сорох нэһилиэктэригэр уопсайа 2043 сайаапканан дуогабар оҥоһуллубут.
Сокуоҥҥа уларытыылар киирдилэр
2020 сылга сокуоҥҥа уларытыылар киирэннэр, билигин технологическай холбонууга сайаапканы онлайн, ол эбэтэр Тус кэбиниэт нөҥүө биэрэр кыахтанныбыт. Урукку өттүгэр электроннай ньыманан олох аҕыйах сайаапка бэриллэр эбит буоллаҕына, чэпчэтиинэн туһанааччылар (150 киловакка диэри уонна 15 киловакка диэри чааһынай дьиэҕэ, даачаҕа холботторооччулар) билигин 90% Тус кэбиниэтинэн бэриллэр. Технологическай холбонуу тарыыбын СӨ Сыана бэлитиикэтин судаарыстыбаннай кэмитиэтэ олохтуур. 15 киловакка диэри холбонууга дуогабары толорторуу тарыыба 550 солкуобайынан быһыллыбыт (уот ситимиттэн 350 миэтэрэттэн тахсыа суохтаах).
Технологическай холбонууга сайаапканы түһэриигэ сир учаастагын бас билии сибидиэтэлистибэтэ, тутууну ыытыы туһунан докумуон, пааспар ирдэниллэр.
Эһиил 32 социальнай эбийиэккэ уот ситимин тардыахтара
— Социальнай суолталаах тутуулары уот ситимигэр холбооһун күүскэ ыытылынна. Ол курдук, Киин электрическэй ситимнэр 24, оттон Арҕаа электрическэй ситимнэр 19 социальнай эбийиэги электричество уотунан хааччыйдылар. Холобурга, Дьокуускай куоракка өрөспүүбүлүкэтээҕи кардиологическай диспансер иккис уочаратын (150 куойкалаах кардиососудистай киин), Уус Алдан Бороҕонугар В.В. Никифоров-Күлүмнүүр аатынан култуура киинин, Хаҥаласка Чапаев с. Наука аччыгый академиятын 150 миэстэлээх үөрэнэр куорпуһун (онно эбии 100 миэстэлээх интэринээт), Горнай улууһун Бэрдьигэстээҕэр 1000 миэстэлээх стадиону, Ньурба Сайылыгар Элбэх хайысхалаах өҥөнү оҥорор киини, Ньурба куоракка 250 миэстэлээх Норуот айымньытын дьиэтин уонна да атын эбийиэктэри ааттаталыахха сөп, — диэн Игорь Александрович үөрэх, доруобуйа харыстабылын, култуура салааларын тутууларыгар үлэ туһунан кэпсээтэ.
Кэлэр сылга технологическай холбонууга үлэ былаана өссө кэҥээтэ. Былаан быһыытынан 32 социальнай эбийиэги, ол иһигэр Дьокуускай куоракка Мерзлотнай уонна Стадухин уулуссаларыгар Кислороднай ыстаансыйалары, Чурапчы Туора Күөлүгэр 90/40 миэстэлээх оскуола-саады, Намҥа Култуура уонна духуобунай сайдыы киинин, Сунтаарга саҥа бассейн бастакы уочаратын холбуохтаахтар.
edersaas.ru