Тохсунньу 22 күнүгэр Сунтаар сэлиэнньэтигэр Манчаарылаах уулуссаҕа баар түөрт кыбартыыралаах дьиэ биир кыбартыыратын өһүөтэ сууллан, улахан алдьархай тахса сыста.
edersaas.ru
Дьолго, ким даҕаны эчэйбэтэ. Бүгүн улуус дьаһалтатыгар тахсыбыт саахалынан хамыыһыйа тэрилиннэ. Барыллааһын быһыытынан, хаачыстыбата суох тутуу ыытыллыбытыттан саахал тахсыбыт буолуон сөп.
Бу дьиэ 2012 сыллаахха үлэҕэ киллэриллибит. Бэдэрээтчит ИП Анисимов С.А. 2013 сыллаахха улуус дьаһалтата СӨ Үөрэҕирии уонна наука министиэристибэтин кытары сөбүлэһии бэрээдэгинэн, «Обеспечение жильем детей-сирот и детей, оставшихся без попечения родителей» судаарыстыбаннай бырагыраамаҕа олоҕуран тулаайах оҕолорго анаан дьиэнэнэн хааччыйбыт.
Тутуу министиэристибэтэ иһитиннэрбитинэн, Манчаарылаах уулусса 21/4 дьиэтигэр баар бастакы кыбартыыраны З. диэн тулаайах киһиэхэ бэриллибитин, кини приватизациялаан баран атын киһиэхэ атыылаабыт. Иккиһинэн, бу түөрт кыбартыыра төрдүөннэрэ приватизацияламмыттар. Өһүөтэ сууллубут кыбартыыра чөлүгэр түһэриллиэр диэри, олохтоохтор быстах кэмҥэ олорор дьиэҕэ (маневренный фонд) көһөрүллүөхтэрэ.
Анивера Акимова, edersaas.ru