Кыайыы күнүн көрсө Уус Алдан улууһун “Татыйык” уһуйаан үлэһиттэрэ, иитиллээччилэрэ нэһилиэк ытык кырдьаҕаһын, II Лөгөй нэһилиэгин бочуоттаах олохтооҕун, Аҕа дойду сэриитин бэтэрээнин, 94 саастаах Василий Ананьевич Васильевы кытта үгэскэ кубулуйбут көрсүһүүнү тэрийдибит.
edersaas.ru
Ол курдук, уоттаах сэрии ыар сылларын, ол кэмнээҕи олоҕу-дьаһаҕы көрдөрөн кэпсээтибит, бэтэрээммит ахтыы оҥордо. Ону тэҥэ, оҕолорбут Василий Ананьевичка анаан сүүмэрдээбит хоһооннорун, бэйэлэрэ оҥорбут өйдөбүнньүк аккырыыккаларын бэлэх ууннулар. Түмүккэ, аны хаһан даҕаны сэрии буолбатын, ыраас халлаан анныгар олорор туһугар баҕа санааларын этэн туран, эйэ холуубун көтүттүлэр.
Нэһилиэккэ ыытыллыбыт Өрөспүүбүлүкэ күнүгэр аналлаах “Сахам сирин туойабын” тэрээһиҥҥэ “Нэһилиэкпит киэн туттар дьоно” научнай-практическай кэмпириэнсийэҕэ биһиги уһуйааммыт тэлгэһэтиттэн икки ыалтан — Габышевтартан (5 уол) Сыромятниковтартан (4 уол) уоттаах сэриигэ ыҥырыллан ытык иэстэрин төлөөбүттэрин туһунан ахтыыны иитээччилэрбит Т.П.Готовцева, В.А.Васильева, Н.Б.Окоемова, Д.Г.Федорова кэпсээн кыайыылаах аатын ылбыттара. Ол ахтыыларын кэпсээн истээччилэри долгуттулар.
edersaas.ru саайтка анаан Татьяна ВАСИЛЬЕВА.