Билигин аан дойдуга сыстыганнаах дьаҥ бүрүүкээн турар тыҥааһыннаах кэмигэр «Тэтим» Саха араадьыйата үгүс дьон санаатын көтөҕөр, сылаас тыынныыр.
edersaas.ru
Бу туһунан Орто Халыматтан төрүттээх киин куорат олохтооҕо Татьяна Санникова санаатын маннык үллэстэр:
— Дьиэҕэ олорор кэммэр саатанарым эрэ «Тэтим» араадьыйа. Хайдах эрэ «Саха» НКИХ үлэһиттэрэ бу мин эрэ туспар анаан кыһаллан үлэлиир курдуктар. Ол да иһин буолуо, бу ыксаллаах быһыы-майгы сотору ааһыаҕа диэн инникигэ эрэл кыымын саҕаллар. Бүгүн олус сөбүлүүр, өр кэмҥэ истибэтэх «Ыллаа, ыллаа, гитарам…» диэн ырыаны истэн дууһам манньыйда, санаам сырдаата. Аны суруналыыс Валентина Петрова ыыппыт биэриитигэр тыйаатыр уонна киинэ артыыһа Маргарита Борисова олоҕун омоонун, артыыс буолбут дьылҕатын, Абакаяда оруолугар хайдах киинэҕэ уһуллубутун туһунан кэпсээбитэ олус интэриэһиргэттэ. Оттон оонньообут испэктээҕэр соҕотох кыыһын кэргэн биэрэн ыытар, долгуйар, айманар кырдьаҕас ийэ монолуогун истэн хараҕым ууланна, ис дууһабыттан долгуйдум. Сөбүлүүр артыыһым талааныгар сүгүрүйүүм өссө бөҕөргөөтө. Олох испэктээҕи илэ көрө олорор курдук сананным. Оо, хаһан бу тыҥааһыннаах кэм этэҥҥэ ааһан, тапталлаах тыйаатырбар тиийэн, талааннаах артыыстарым ис иһиттэн оруолларыгар киирэн оонньуулларын холкутук, туохтан да куттаммакка, сэрэммэккэ, илэ харахпынан көрөн, эт кулгаахпынан истэн, ытыһым тыаһынан махталбын тиэрдэбин?…
Үчүгэйиэн бу олоххо араадьыйа аргыстаах буолар! Дьиэ үлэтин бүппэт түбүгүн быыһыгар аттыбар сахалыы төрүт ийэ тылбынан тохтоло суох араадьыйам саҥарар. Махтал буоллун араадьыйам үлэһиттэригэр — дьон дууһатын угуттуур олус наадалаах үлэлээх дьоҥҥо! Дьиэбитигэр олорор кэммитигэр эһиги баар буолан, күммүтүн билбэккэ хаалабыт. «Тэтим» араадьыйа — дууһам эмэ!
Кырдьык, оннук. Үгүс киһи үлэ күнүгэр «Тэтим» араадьыйаны истээри, өссө тэлэбиисэринэн көрөөрү, сарсыарда сэттэттэн уһукталлара — ол кинилэр араадьыйаларыгар тапталларын уонна бэриниилэрин туоһута.
Елена ПОТОЦКАЯ, «Саха сирэ» хаһыат, edersaas.ru