Татьяна Голикова РФ Бырабыыталыстыбатын мунньаҕар туох туһунан эппитин манна ааҕыҥ.
Иллэрээ күн Владимир Путин РФ Бырабыыталыстыбатын мунньаҕар кыттыбыта. Онно РФ Бырабыыталыстыбатын бэрэссэдээтэлин солбуйааччы Татьяна Голикова ковид-19 дьаҥын утары ыытыллар үлэ туһунан кылгастык маннык эппитэ:
— Быһыыны ылыы тэтимэ эрэгийиэннэргэ араас. Бүгүн 100 тыһыынча нэһилиэнньэҕэ быһыыны ылбыттар ортолоругар Краснодар кыраайа, Москва, Тула, Ростов, Липецкэй, Смоленскай уобаластар, Хакасия Өрөспүүбүлүкэтэ, Мордовия, Адыгея Өрөспүүбүлүкэтэ, Москва куорат, Чечня Өрөспүүбүлүкэтэ иһэллэр.
Аны вакцинаны оҥорон таһаарыыга тохтоотоххо, оҥорон таһаарааччылар от ыйыгар-балаҕан ыйыгар 67 мөл кэмпилиэги уонна вакцина дозатын эргииргэ таһаарыахтара, ол иһигэр от ыйыгар – 12,7 мөлүйүөнү. Бу кээмэй өссө да быһыыны ыла иликтэргэ уонна хаттаан быһыыны биэриигэ туһаныллыаҕа.
Бастакы быһыы уонна ыалдьыы кэнниттэн хаттаан быһыыны ылыахха сөп дуо дииллэр, өскөтүн антитела таһыма сөптөөх буоллаҕына. Манан сибээстээн этиэхпин баҕарабын, ыытыллыбыт чинчийиилэргэ олоҕуран эттэххэ, коронавируһунан ыалдьыбыт эбэтэр быһыы ылбыт дьоҥҥо иммунитеттара ортотунан алта ый тулуктаһар, 9-12 ыйыгар көмүскэлэ сыыйа мөлтүүр. Онон ыарыы эпидемията үрдүүр кэмигэр Доруобуйа харыстабылын аан дойдутааҕы тэрилтэтэ алта ый буолан баран быһыыныы ыларга сүбэлиир. Бу ыалдьан үтүөрбүт уонна эрдэ быһыы ылбыт дьоҥҥо эмиэ сыһыаннаах. Онтон кэлэктиибинэн иммунитет үөскээтэҕинэ, эпидемия өрө турбат кэмигэр быһыыны 12 ыйга биирдэ ылыахха сөп. Маннык ньыманы Европа дойдулара эмиэ тутуһаллар.
Хамсык туруоҕуттан биһиэхэ 8–800–2000–112 федеральнай “итии линия” үлэлиир. Манна нэдиэлэ аайы 80 тыһыынча киһи эрийэр.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: интэриниэттэн