Бырабыыталыстыба Бэрэссэдээтэлин солбуйааччы Татьяна Голикова федеральнай министиэристибэлэри уонна эрэгийиэннэри кытта үөрэх тэрилтэлэрэ саҥа үөрэх дьылыгар бэлэмнэниилэригэр сүбэ мунньах ыытта.
Вице-премьер саҥа үөрэх дьыла судургута суох усулуобуйаҕа ыытылларын эттэ – уруккутун курдук санитарнай-эпидемиологическай туругунан хааччахтыыр миэрэлэр тохтуу иликтэр уонна кэккэ нэһилиэнньэлээх пууннар халаан уутугар уонна баһаарга түбэспиттэр.
Бүгүн үөрэх тэрилтэлэрин 95 бырыһыана (83 тыһ. тахса) дойду үрдүнэн үөрэҕи саҕалыырга бэлэмнэр.
Маны сэргэ балаҕан ыйын 1 күнүгэр 130 оскуолаҕа 84 тыһ. тахса уонна 61 дьыссаакка 10,5 тыһ. миэстэни үлэҕэ киллэриэхтэрэ.
“Биһиги бастакы уочараттаах сорукпут – үөрэх хаамыытыгар кыттааччылар доруобуйаларын уонна олохторун кутталга киллэриэ суохтаахпыт. Ковид эрэ буолбакка үөрэх тэрилтэлэрэ кэлимсэ куттала суох буолуохтаахтар, баһаары уонна терроризмы утары”, — диэтэ Татьяна Голикова.
Росгвардияны, ЫБММ уонна ИДьМ кытта үөрэх тэрилтэлэригэр бэрэбиэркэ ыытыллар. ИДьМ үөрэх тэрилтэлэрэ криминалы утары толору бэлэмнээх буолууларыгар балаһыанньа тупсубутун бэлиэтээтэ: физическэй харабыллаах тэрилтэ ахсаана 41 быр. элбээбит, 33,5 быр. – ыксаллаах сигналы биэрэр кунуопканан, 22 быр. – видеонан кэтээн көрүү.
Татьяна Голикова халаантан уонна баһаартан сылтаан балаҕан ыйын 1 күнүгэр кыайан аһыллыбат үөрэх тэрилтэлэрдээх эрэгийиэннэр этиилэрин иһиттэ.
Кини ураты болҕомтотун алын кылаас үөрэнээччилэрин итии аһылыгынан хааччыйыыга уурда уонна Роспотребнадзор аһылык блоктарын бэлэмигэр уурар ирдэбиллэрин толорорго эттэ.
Роспотребнадзор чахчытынан, 9 эрэгийиэҥҥэ 184 оскуола маннык ирдэбилгэ сөп түбэспэт. Итилэртэн 4 эрэгийиэҥҥэ 45 оскуола кыра комплектаах уонна уустук суоллаах-иистээх. Онон баларага итии аһылыгы бородуукта нобуорунан биэрэллэр эбит.
Мунньах түмүгүнэн Татьяна Голикова губернатордарга үөрэх тэрилтэлэрин бары ирдэбиллэргэ сөп түбэһиннэрэри ситиһэллэригэр сорудахтаата. Ону сэргэ балаҕан ыйын 1 күнүн тэрийиигэ эпидемиология балаһыанньатынан бары миэрэлэри тутуһарга эттэ.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: саайтан