Татьяна Голикова: «Коронавирустаабыт дьон быһыыны ылаллара ирдэммэт»
“Коронавируһунан ыалдьа сылдьыбыт дьон быһыыны ылаллара наадалаах дуо?” — диэн ыйытыы элбэх дьону интэриэһиргэтэр.
edersaas.ru
Ыарыы туруоҕуттан балай да элбэх киһи коронавирустаан баран өрүттүбүттэрэ. Сорохторго хат анаалыс көрдөрөрүнэн вируһу утары үлэлиир антителаларын ахсаана лаппа аччаабыт. Онон эбии харыстанар сыалтан вакцина ылыахха сөп дуу, суох дуу диэн саарбахтыыр дьон эмиэ баар.
Аҕыйах хонуктааҕыта бу ыйытыыга РФ вице-премьера Татьяна Голикова:
— Коронавируһунан ыалдьа сылдьыбыт дьон быһыыны ылаллара ирдэммэт. Оннооҕор антителаларын ахсаана түспүт да буоллаҕына, өссө клетка иммунитета хайдах үлэлиирин көрүөх тустаахпыт — диэн эппитэ.
Билиҥҥи күн көрдөрүнэн иккистээн ыарыыга сыстыбыт дьон ахсааннаах. Ону даҕаны ити түгэннэр хайдах быһыылаахтык буолбуттара өссө да толору быһаарылла илик эбит. “Баҕар сыыһа диагноз буолуон сөп, баҕар маҥнайгы сутуллуу атын чэпчэки формалаах вирус көрүҥэ буолуон сөп” — диэбит Татьяна Голикова. Ону таһынан кэтээн көрүү түмүктэринэн иккистээн сутуллуу түгэннэригэр ыарыы чэпчэкитик ааһара бэлиэтэммит.
«Саха сирэ» хаһыат, edersaas.ru
© Александр Астафьев/POOL/ТАСС