Татьяна Гоголева: «Кэлэр сыл Доруобуйа сылынан биллэриллибитэ мэдиссиинэ үлэһиттэригэр олус үчүгэй»
Татьяна Айсановна Гоголева, 3-с №-дээх Дьокуускайдааҕы балыыһа клинико-диагностическай лабораториятын сэбиэдиссэйэ Ил Дархан Анал этиитин туһунан санаатын үллэстэр:
— Ил Дархан Анал этиитигэр олохпут бары салаата таарыллыбыт эбит. Мэдиссиинэ үлэһитэ буоларым быһыытынан, кэлэр сыл өрөспүүбүлүкэҕэ Доруобуйа сылынан биллэриллибитин истэммин үөрдүм. Кырдьык, аан дойду үрдүнэн доруобуйа харыстабыла маҥнайгы уочараттаах сыалынан буолла. Кэлэр сыл нэһилиэнньэҕэ доруобуйа туһунан элбэх үөрэтиини, өйдөтүүнү аҕалыа диэн эрэллээхпин. Тоҕо диэтэр, киһи доруобуйата олоҕун уобараһыттан саҕаланар.
Доруобуйа саҥа эбийиэктэрэ, суһал ыстааптар тэриллэллэрэ саамай сөп. Аны кэлэр сылга персонализированнай мэдиссиинэ олоххо киириэ диэн эттилэр. Бу эмиэ тоҕоостоох кэмҥэ болҕомтоҕо ылыллыбыта үчүгэй. Билигин хас биирдии ыарыһахха болҕомто күүһүрэригэр сөптөөх аныгы систиэмэ, тэриллэр үлэлиэхтэрин наада. Тустаах өйөбүлгэ мэдиссиинэ наукатыгар эмиэ элбэх саҥа көрүүлэр, арыйыылар баар буолуохтара диэн эрэнэбин.
Биһиги лабораториябыт икки быраастаах, алта лабораннаах балаҕан ыйыттан үлэтин саҕалаабыта. Бастаан үс ПЦР анаалыһынан быһаарар тэриллээх этибит. Бу аҕыйах хонуктааҕыта саҥардыллыбыт кинфишер, ол аата полуавтоматическэй анаалыһы оҥорор тэрил кэллэ. Манан үлэбит өссө түргэтээтэ. Бүгүн анаалыһын туттарбыт киһи сарсын сарсыарда түмүгү ылар кыахтанна.
Бастаан, биллэн турар, олус ыарахан этэ. Балаҕан ыйыттан саҕалаан сэтинньи ортотугар диэри үлэбитигэр хоно сылдьан үлэлиир этибит. Үлэһиттэрим биир да киһи үҥсэргээбэккэ, ыарахан диэбэккэ үлэлээн кэлбиттэригэр махталбын тиэрдэбин. Билигин ыалдьыбыт киһи анаалыһы хайаан да үстэ туттарыахтаах диэн сорук суоҕунан сибээстээн, тэриллэрбит эбиллэннэр үлэбит арыый да чэпчээтэ.
Виктория Бястинова, edersaas.ru