Аммаҕа ыытылла турар спортивнай оонньууларга Амма кыыһа Татьяна Бурым үчүгэйдик истибэт дьахталларга икки дистанцияҕа кыайыыны ситистэ. Кыайыытын туһунан Татьяна санаатын үллэстэр:
— Мин 1500 м, 2000 м уонна 3000 м сүүрүүгэ Арассыыйа чөмпүйүөнэ буолабын. Онон бу оонньууларга сүүрүү чэпчэкитик кэллэ. Дьаныһан туран дьарыктанар этим, дьарыкпын биирдэ даҕаны көтүппэтэҕим. Сүүрүүнэн үс сыллааҕыта эрчиллэн саҕалаабытым. Бу иннинэ спордунан ончу дьарыктаммат киһи этим. 2016 сыл ахсынньытыгар үөрэҕим кэнниттэн туох эмит дьарыктаах буолбут киһи диэн саныы сылдьан биллэриини аахпытым. Онтон спорт саалаҕа тиийэн, тириэньэрдиин кэпсэтэн, сүүрэн саҕалаабытым. Билигин Дьокуускайдааҕы үчүгэйдик истибэттэр оскуолаларыгар үөрэнэбин, онус кылааһы бүтэрдим. Сүүрүүнү таһынан волейболлуубун, теннистыыбын уонна хайыһардыыбын.