«Татарстаҥҥа Саха сирин күннэрэ» тэрээһин чэрчитинэн ыытыллыбыт «төгүрүк остуолга» Арассыыйаҕа бырамыысыланнас салаатыгар туризмы сайыннарыыны дьүүллэстилэр.
Саха сиригэр баар бырамыысыланнас тэрилтэлэригэр экскурсионнай туурдары ыыталларын Татарстаҥҥа туризмы сайыннарыыга үлэлэһэр дьон олус интэриэһиргээтилэр.
«Бу кэскиллээх туризм эйгэтэ Саха сиригэр олоххо киирэн эрэр көрүҥ. Ол курдук, алмаас, көмүс, чох хостооһунун, үрүҥ көмүс уонна түүлээх хайдах производственнай сыахтарга оҥоһуллалларын интэриэһиргиир дьон үгүс. Ол эрээри өрөспүүбүлүкэбит олус ыраах буолан уонна бырамыысыланнас тэрилтэлэрэ нэһилиэнньэлээх пууннартан ойуур, хайа анныгар тэйиччи баар буолан (айан, көлө булар уустук), туристары аҕалыы ыарахаттардаах», — диэн санаатын үллэһиннэ предпринимательство уонна туризм миниистирэ Ирина Высоких.
« Бырамыысыланнаска туризм бырайыагын биһиги 2020 сыл от ыйын 8 күнүттэн саҕалаабыппыт. Ити күн Стратегическай көҕүлээһин ааҕыныстыбата уонна Саха сирэ INNOPROM Норуоттар икки ардыларынааҕы бырамыысыланнас пуорумугар Сөбүлэҥ баттаспыттара
«, — диэн кэпсээтэ СӨ Туризм сайдыытын ааҕыныстыбатын уонна территориальнай маркетинын генеральнай дириэктэрэ Наталья Тюкавкина.
Бэйэтин үлэлиир былаһааккатыгар аан бастаан туристары «Колмар» хампаанньа сырыттаран билиһиннэрбитэ. Бу саҥа сүүрээн туһунан «Колмар-тур» ХЭУо управляющай- дириэктэрэ Алина Чикина сырдатта. Кини бэлиэтээбитинэн, «Колмар-тур» хампаанньаны туристическай эбийиэк быһыытынан «Денисовскай», «Инаглинскай» комплекстарга сырытыннаран билиһиннэрэллэр. Экскурсия бырагыраамата: сир анныгар киирэн, шаахтаҕа сылдьыы, обогатительнай фабрикалары көрүү, «Колмар» тиэхиньикэни өрөмүөннүүр сүүнэ улахан баазатыгар сылдьан, үлэни-хамнаһы билсии. «Дьыалабыай» туристартан ураты манна профориентационнай үлэ чэрчитинэн оскуола оҕолоро уонна устудьуоннар сылдьаллар.
Татарстаҥҥа туризмы сайыннарыыга үлэлэһэр исписэлиистэр Саха сиригэр ыытыллар бэрт кэскиллээх уопуту сэргээн, тус бэйэлэринэн бу ааттаммыт эбийиэктэри көрө-истэ кэлиэх буоллулар.
Елена ПОТОЦКАЯ, «Саха сирэ» хаһыат, edersaas.ru