Татарстаҥҥа «Sakha Innovation» инновационнай бырайыактар быыстапкалара аһылынна

Бэс ыйын 8 күнүгэр  Татарстаҥҥа Саха сирин күннэрин иитинэн,  «Sakha Innovation»  инновационнай бырайыактар быыстапкалара аһылынна. Казань куоракка  IT-пааркаҕа үлэлиир  быыстапка аһыллыытын сиэригэр-туомугар СӨ Ил Дархана Айсен Николаев кыттыыны ылла.

«Биһиги «SakhaInnovation» быыстапканы олоххо кытары тэҥҥэ хардыылыыр, тэтимнээхтик сайдар сыаллаах астыбыт. Биһиги атын эрэгийиэннэргэ баар кэллиэгэлэрбитин кытары көрсөн, уопут атастаһыахтаахпыт.  Татарстан инновацияны сайыннарыыга дойду үрдүнэн инники күөҥҥэ сылдьар», — диэн  Айсен Сергеевич эттэ.

Быыстапка кыттыылаахтарын Татарстан  цифровой сайдыыга,  информационнай технологияҕа уонна сибээскэ миниистирэ  Айрат Хайруллин эҕэрдэлээн туран: «Биһиги Саха сирин уопутун сөҕө-махтайа көрдүбүт. Цифровизацияҕа Саха сирэ саҥа сонун технологиялардаах.  Саха сирин уонна  Татарстаны экономическай сибээһи  ситимниирин таһынан, култуурата кытары майгыннаһар эбит.  Төрүт норуоттар үгэстэрин харыстыырга, араҥаччылыырга улахан болҕомтотун уураллар». — диэтэ.

Тэрээһин чэрчитинэн СӨ Инновацияҕа министиэристибэтэ Татарстан цифровой сайдыыга,  информационнай технологияҕа уонна сибээскэ миниистиэристибэтэ сөбүлэһии түһэристилэр.

СӨ Ил Дарханын уонна бырабыыталыстыбатын пресс-сулууспата