Татарстаҥҥа саха поэзиятын антологията бэчээттэнэн таҕыста

Бөлөххө киир:

Бу күннэргэ биһиэхэ, Саха сирин Суруйааччыларын сойууһугар, олус үөрүүлээх сонун кэллэ. Казань куоракка, Татарстан кинигэтин кыһатыгар  саха поэзиятын антологията күн сирин көрдө! Маннык кинигэ сотору кэминэн тахсыахтааҕын билэ да сырыттарбыт, ордук, бу билигин, пандемия бүрүүкээбит кэмигэр, маннык үчүгэй сонуну тутар хас да бүк үөрүүлээх буолла, — диэн Саха сирин Суруйааччыларын сойууһун бырабылыанньатын бэрэссэдээтэлэ, саха норуодунай бэйиэтэ Наталья ХАРЛАМПЬЕВА үтүө сонунун үллэһиннэ.

edersaas.ru

Саха сирин суруйааччылара Татарстан суруйааччыларын кытта өрдөөҕүттэн доҕордууларын бары билэбит. Татарстан кинигэтин кыһатын кытта дьыалабыай, истиҥ сибээс олохтоммута эмиэ балачча буолла. Аҥардас, Саха суруйааччылара тэрийэн ыытар “Үрүҥ хаар сылааһа” норуоттар икки ардыларынааҕы поэзия бэстибээлин да ылан көрдөххө, татаар суруйааччылара – бэстибээл биир саамай көхтөөх кыттааччылара, күндү ыалдьыттара. Кинилэр бу сыллар тухары үгүс саха бэйиэтин айымньытын тылбаастааннар, бэйэлэрин периодикаларыгар тиһигин быспакка бэчээттэтэ тураллар.

Ити курдук айымньылаахтык үлэлэһэннэр, бу улахан холбоһуктаах бырайыак олоххо киирдэ. Биллэн турар, хайа даҕаны саҕалааһын, ханнык даҕаны дьыала инники дьылҕата, тылларыгар турар, эппиэтинэһи бэйэлэригэр ылынар туһааннаах чопчу дьонтон тутулуктааҕын бары өйдүүбүт.  Кинилэр, материальнай барыс туһунан санаан да ылбакка, баһыйар үксүгэр, үрдүк духуобунай өйүнэн-санаанан эрэ салайтаран, маны ылсаллар уонна олоххо киллэрэллэр. Бу да сырыыга оннук буолла. Бырайыак идиэйэтин ааптардара – Татарстан норуодунай бэйиэтэ Ркаиль Зайдулла уонна саха норуодунай бэйиэтэ Наталья Харлампьева. Оттон бырайыак салайааччытынан Татарстан өттүттэн биллииилээх бэйиэт, Татарстан кинигэтин издательствотын  кылаабынай эрэдээктэрэ  Ленар Шаехов, саха суруйааччыларын өттүттэн түмэн, хомуйан оҥорооччунан Саха сирин Суруйааччыларын сойууһун бырабылыанньатын бэрэссэдээтэлин солбуйааччы Гаврил Андросов буоллулар. Бэчээккэ бэлэмнээһин, тиэкистэрин оҥорууга, хаартыскаларын талыыга   эрэдээктэрискэй үлэни эрэйэр, бу чааһынан саха суруйааччылара Елена Слепцова-Куорсуннаах, Альбина Борисова уонна Рустам Каженкин түргэннэрин-тарҕаннарын көрдөрдүлэр.

Дьэ, онон, саҥа  кинигэ күн сирин көрдө! Саха бэйиэттэрин татаар бастыҥ бэйиэттэрэ Ркаиль Зайдулла, Ленар Шаехов, Галимьян Гильманов, Рафис Курбан, Фируза Замалетдинова, Рузаль Мухаметшин, Луиза Янсуар, Лилия Гибадуллина, Ильгам Ногуманов, Гелюса Батталова, Рифат Салах уонна Фанир Гилязов тылбаастаатылар.  Кинигэ сахалыы уонна татаардыы — икки омук тылынан таҕыста. Киирии тыллары  Ркаиль Зайдулла уонна Наталья Харлампьева суруйбуттар. Тахсыбыт ахсаана, омос көрдөххө, олус улахана суох эрээри, 1100 эксэмпилээр диэн, билиҥҥи быһыыны-майгыны учуоттаатахха, куһаҕана суох.

Мин санаабар, бу кинигэ Татарстан поэзияны таптааччыларыгар эрэ буолбакка, уруулуу норуоттарбытыгар түҥ былыргы түүр омук поэзиятын үгэстэрин кэтээн көрөр, үөрэтэр чинчийээччилэргэ улахан суолталаах буолуоҕа.  Бу бырайыак, Саха сирин Суруйааччыларын сойууһа Арассыыйа эрэгийиэннэрин, СНГ өрөспүүбүлүкэлэрин, омук дойдуларын суруйааччыларын кытта сибээһи бөҕөргөтүүгэ былааннаах, ситимнээх үлэни ыытарыттан  олоххо киирэр кыахтанна.  Ол курдук, холобур, 2014 сыллаахха саха аныгы поэзиятын антологията Варшаваҕа польскай тылынан тахсыбытын өйдүүргүт буолуо. Оттон 2017 сыллаахха Саха сирин Суруйааччыларын сойууһа татаар аныгы поэзиятын антологиятын сахалыы тылынан бэчээккэ таһаарбыта. Маннык бырайыактар, судаарыстыба тылбаас бырайыактарын соччо өйөөбөт кэмнэригэр,  саха бэйиэттэрэ бэйэлэрин аудиторияларын кэҥэтэллэригэр, саҥа таһымҥа тахсалларыгар кыаҕы биэрэллэр. Ис дьиҥэр, бу кинигэлэр – норуот айымньылаах дипломатиятын  үтүө түмүктэрэ, — диир Наталья Ивановна.

Оттон билигин Татарстаҥҥа да, Саха сиригэр да, суруйааччылар, поэзияны таптааччылар, көннөрү ааҕааччылар да, биллэн турар, инникитин, маннык судургута суох кэмҥэ бэйэ-бэйэҕэ өйөбүл, истиҥ доҕордуу сыһыан иһин махтал тылларын этээри,  саҥа кинигэ сүрэхтэниитин кэтэһэллэрэ чахчы.

                                                                                     Татьяна МАРКОВА, edersaas.ru

+1
0
+1
0
+1
0
+1
0
+1
0
+1
0
+1
0