Маны аах Уопсастыба

Татарстаҥҥа национальнай хаһыат, тэлэбиидэнньэ, араадьыйа бэрэстэбиитэллэрэ, суруналыыстар пуорумнара саҕаланна

Атырдьах ыйын 29-30 күннэригэр Татарстаҥҥа национальнай хаһыат, тэлэбиидэнньэ, араадьыйа бэрэстэбиитэллэрэ, суруналыыстар пуорумнара тохсус төгүлүн саҕаланна.

Пленарнай мунньахха Татарстан Судаарыстыбаннай Сэбиэтин Бэрэссэдээтэлэ Фарид Мухаметшин тыл этэригэр Татарстан омуктар эйэлээх сыһыаннарын олохтуурга баай уопутугар олоҕуран ити эйгэҕэ үлэлиир суруналыыстар эппиэтинэстэрин тоһоҕолоото. Кини национальнай хаһыаттар, тэлэбиидэнньэ, араадьыйа ийэ тыл сайдарыгар, култуура чөл хааларыгар улахан суолталаахтарын бэлиэтээтэ. Онон судаарыстыба үбүнэн-харчынан мэлдьи өйүүр. Аҥардас быйыл омуктар икки ардыларыгар сыһыаны бөҕөргөтөргө, тылы, култуураны харыстыырга 900 мөлүйүөн солкуобай бүддьүөттэн көрүллүбүт.

Госдуума омуктар дьыалаларыгар кэмитиэтин бэрэссэдээтэлэ Геннадий Семигин этэринэн, билиҥҥи Арҕааҥы дойдулар Арассыыйаны атарахсыта сатыыр кэмнэригэр саҥалыы тиһиктээх үлэ ирдэнэрин уонна идеология наадатын ыйда.

Пленарнай мунньахха «Этностар икки ардыларынааҕы суруналыыстыка гильдия» салайааччыта Маргарита Лянге омук бэйэ тылынан таһаарар хаһыаттара сыыппара эйгэтигэр, Интэриниэккэ хото киириэхтээхтэрин ыйда. Кини этэринэн, национальнай СМИ матырыйаалларын ис хоһоонноро дириҥ буолан, кэскиллээхтэр. Мунньахха «Интерфакс» генеральнай дириэктэрин солбуйааччыта Николай Касьянов, РФ Уопсастыбаннай палатын омуктар уонна итэҕэллэр икки ардыларыгар сыһыаннаһары бөҕөргөтөргө хамыыһыйа бэрэссэдээтэлэ Владимир Зорин уо.д.а. тыл эттилэр. Пуорумҥа 29 эрэгийиэнтэн кытталлар.

Пуорумҥа «Сахамедиа» генеральнай дириэктэрэ Виктор Колесов, «Саха сирэ» хаһыат сүрүн эрэдээктэрэ Чокуур Гаврильев, СИА сүрүн эрэдээктэрэ Андрей Никифоров кыттыыны ылаллар.

«Татарстан норуоттар икки ардыларынааҕы сыһыаннаһыылары сайыннарыы уонна бөҕөргөтүү эйгэтигэр лиидэр буолар. Быйыл Саха сирин бэрэстэбиитэллээх делегацията национальнай иһитиннэрэр-биллэрэр сириэстибэлэр IX пуорумнарыгар кыттыыны ылара үөрүүлээх. Пуорумҥа национальнай хаһыаты, тэлэбиидэнньэни, араадьыйаны сайыннарыы, суруналыыстар олоххо-дьаһахха оруолларын уонна эппиэтинэстэрин туһунан дьүүллэһиэхпит. Бу арҕааҥҥы дойдулар киллэрэр хааччахтарын, идеологическай баттааһыннарын кэмигэр олус улахан суолталаах хайысха буолар. «Сахамедиа» бэрэстэбиитэллэрэ «Татмедианы» кытта уопут атастаһар былааннаахпыт, » — диэн Чокуур Гаврильев кэпсиир.

Пуорум делегаттарын бэҕэһээ Свияж диэн арыыга турар куоракка сырытыннардылар. Туристическай комплекс 16-й үйэтээҕи нуучча омук култууратын, оччотооҕу олоҕун-дьаһаҕын билиһиннэрэр.

edersaas.ru

Чокуур Гаврильев хаартыскалара.

0
0
Telegram Whatsapp