Бэс ыйын 22-25 күннэригэр Саха сиригэр ыытыллар Татарстан Өрөспүүбүлүкэтин күннэрин чэрчитинэн, “Татарстан киинэтин күннэрэ” ыытыллыахтара.
“Татаркино” дириэктэрэ Миляуша Айтуганова пресс-кэмпириэнсийэҕэ бу курдук кэпсээтэ:
—Саха киинэтин оҥорооччуларын кытары өрдөөҕүттэн кытары доҕордоһобут. Былырыын Казаньҥа саха киинэтин күннэрэ буолбуттара. Сахалар киинэ эйгэтигэр аан дойдуга, Арассыыйаҕа да улахан ситиһиилээхтэр. Саха киинэтэ билигин олус сайдан иһэр. “Прокатка” биһигиттэн үөрэнэллэр, биһиги киинэни устарга кинилэртэн үөрэнэбит.
Саха сиригэр киинэ устуутун өйүүр сокуон ылыллан, сыллата 80 мөлүйүөн солкуобай көрүллэр. Бу кинилэр чорбойор өрүттэрэ буолар, онно ымсыырабыт эрэ.
Ол эрээри, Саха сиригэр киинэ ситимэ сайдыбатах. Олус киэҥ иэннээх, суола-ииһэ мөлтөх, оттон нэһилиэнньэтин ахсаана 1 мөлүйүөн эрэ. Онон сүрүннээн, киин куоракка эрэ киинэ тыйаатырдара бааллар. Биһиэхэ 30 киинэ саалата федеральнай бырагырааманан саҥардыллыбыт буоллаҕына, Саха сиригэр – 16 саала. “Пушкин каартатынан” 12 саха киинэтин көрүөххэ сөп. Саха киинэлэрэ бары тыйаатырдар репертуардарын былааныгар бастакынан киирэллэр. Биһиги Казаньҥа да көрдөрөргө эрэйи көрөбүт.
Ыраах, ойдом олорор буолан, сахалар бэйэлэрин култуураларын, тылларын олус таптыыллар, сыаналыыллар, онон сахалыы тыллаах киинэни өйүүллэр. Биһиги да киинэбит куһаҕана суох, күрэстэргэ да кыттар кыахтаахпыт. Сахалар киинэни сайыннарарга туспа суолунан бараллар – нэһилиэнньэ аҕыйах буолан, элбэх үбү хомуйарга туһуламмакка, бэстибээллэргэ, күрэстэргэ кыттан, ситиһиилэнэллэр. Онон биһиги кинилэртэн үөрэнэрбит элбэх.
«Живы ли мы?» киинэ «Лена» тыйаатырыгар көстүөҕэ.
Саха сиригэр “Татарстан киинэтин күннэрэ” аан бастаан ыытыллаллар. Элбэх киинэ көстүөҕэ. Сүрүннээн Дьокуускайга “Лена” киинэ тыйаатырыгар көстүөҕэ. Кэлэн көрөргүтүгэр ыҥырабыт!
Ону тэҥэ, бииргэ киинэ уһулар былааннаахпыт. Бу сырыыга баран бары ымпыгын-чымпыгын ырытыһыахпыт. Билиҥҥитэ бары кистэлэҥин арыйбаппын. Башкортостан, Татарстан, Саха сирэ киинэ оҥорооччулара федеральнай сокуоҥҥа “национальнай киинэ” диэн өйдөбүлү уларытар, эбиилэри киллэрэр туһунан сурук суруйдубут. Онон уларытыылары аны күһүн Госдуумаҕа көрүөхтэрэ диэн эрэнэбит.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.