Саха сирин Ил Дархана Айсен Николаев “Арктик Капитал” хампаанньалар бөлөхтөрүн тэрийээччи Матвей Евсеевы кытары көрүстэ.
Өрүттэр 2022 сылга хампаанньа былааны толоруутун хаамыытын уонна инники сайдыытын дьүүллэстилэр. Сааҥсыйа усулуобуйатыгар тиэхиньикэни солбуйуу боппуруостарын уонна хампаанньа өрөспүүбүлүкэ улуустарын социальнай-экэнэмиичэскэй сайдыытыгар кыттыытын боппуруостарын көрдүлэр.
«Билигин көрсөр ыарахаттарбытын дьүүллэстибит. Тоҕо диэтэххэ, көмүһү, чоҕу, үрүҥ көмүһү, алмааһы хостооһуну кытары сибээстээх бырамыысыланнас барыта омук тиэхиньикэтинэн хааччыллар. Биһиги ити боппуруостары быһаарабыт, икки-үс сыллааҕыта ылыллыбыт былааннары хос көрөбүт”, — диэтэ Матвей Евсеев.
Холдинг тэрилтэлэрэ өрөспүүбүлүкэҕэ Арктика оройуоннарыгар көмүһү хостооһунунан, таһаҕаһы тиэйиинэн, геология чинчийиилэринэн дьарыктаналлар.
Надежда ЕГОРОВА, «Саха сирэ», edersaas.ru