“Уһук Илиҥҥи гектар” сокуонун чэрчитинэн, Саха сирин былаастара сир учаастагын босхо биэрэр туһунан 7,6 тыһ. дуогабары оҥордулар итиэннэ түөрт пилотнай зонаны тэрийэргэ быһааран, онно суол-иис, электроэнергиянан хааччыйыы боппуруостарын быһаарар былааннаахтар диэн ”ТАСС” иһитиннэрэр ааҕыныстыба (https://dv.land/news) сырдатар.
edersaas.ru
Санатан эттэххэ, “Уһук Илиҥҥи гектар” сокуона 2016 сыл бэс ыйын 1 күнүттэн олоххо киирбитэ. Онуоха босхо сир учаастагын ылбыт гражданин бастакы сылыгар бу сиригэр тугунан дьарыктанарын, туох үлэни-хамнаһы тэринэрин быһаарыахтаах, үс сылынан ону төһө толорбутун туһунан декларацияны толоруохтаах, биэс сылынан ол сирин уһатыллыбыт болдьоххо түүлэһиэхтээх эбэтэр бас билиитигэр ылыахтаах. Иккиһинэн, бу сокуон чэрчитинэн Хабаровскайга, Сахалиҥҥа үс саҥа бөһүөлэк тутуллуохтаах, Саха сиригэр, Камчаткаҕа, Приморьеҕа, Хабаровскайга, Амур, Сахалин уобаластарыгар 30 нэһилиэнньэлээх пуун кэҥэтиллиэхтээх. Бу сокуону олоххо киллэриигэ биһиги өрөспүүбүлүкэбит Приморскай уонна Хабаровскай кыраайдар кэннилэритэн үһүс миэстэҕэ сылдьар. Барыта 19 тыһ. 600 сайабылыанньа киирбититтэн, 7 тыһ. 540 дуогабар оҥоһулунна. Нэһилиэнньэлээх пууннары кэҥэтии пилотнай бырайыагынан түөрт бөһүөлэк: Партизан (Нам), Антоновка (Ньурба), Петровка (Мэҥэ Хаҥалас) уонна Булуҥ (Амма) үлэлииллэр.
Партизан нэһилиэгин землеустроителэ Валерий Мордовской этэринэн, олохтоох дьаһалта пилотнай бырайыакка 135 уһаайбалаах түөлбэ тутуутун киллэртэрэн, генеральнай былааны оҥорторо итиэннэ суол-иис, уот боппуруоһугар үлэлэһэ сылдьар. Саҥа түөлбэҕэ уһаайба сирин сүрүннээн олохтоохтор уонна атын улуустарга олохсуйбут мантан төрүттээх дьон ылаллар. Бөһүөлэк олохтооҕо Варвара Москвитина уопсай дьиэҕэ олорор эбит, ол иһин саҥа түөлбэҕэ уһаайба ылан, эһиил киирэрдии оҥостон дьиэ тутта сылдьар. Оттон учаастагар хайы-сах икки этээстээх дьиэни дьэндэппит Евгений Гермогенов аны сайын тэпилииссэ оҥостон, оҕуруотунан дьарыктанар санаалаах.
“Уһук Илиҥҥи гектары” таһынан быраҕыллыбыт бааһыналары, ходуһалары чөлүгэр түһэрэр, ыраах учаастактары туһаҕа таһаарар сыаллаах “саха гектарын” бырайыагынан чааһынай ыалларга 2,5 гектар, бааһынай хаһаайыстыбаларга 20 гектар сир бэриллэр. Табыгастаахтык алтыспыт икки бырагырааманан 40 мөл. солк. көмө көрүллэн, 25 киһи, ол иһигэр Тыа хаһаайыстыбатын министиэристибэтин субсидиятынан үс киһи, Инвестсайдыы министиэристибэтин гранынан үс киһи туһанан, ким сылгы базатын туттан, ким бааһына оҥостон, тыа хаһаайыстыбатын бородууксуйатын оҥорон таһаарар үлэни тэрийэ сылдьаллар. Тыйыс айылҕалаах, ол эрээри үтүө үлэһит дьонноох Саха Өрөспүүбүлүкэтигэр “босхо гектар” сокуонунан маннык дьоһун үлэ-хамнас ыытылларын ”ТАСС” ИА курдук бөдөҥ хампаанньа болҕомтотугар ылан, дойду үрдүнэн холобур оҥорон сырдатта.
Раиса Сибирякова, «Саха сирэ» хаһыат, edersaas.ru
+1
+1
+1
+1
+1
+1
+1