Арассыыйа Тас дойдуларга министиэристибэтин бэрэстэбиитэлистибэтэ Дьокуускайга тэриллибитэ 15 сылын чэрчитинэн бүгүн Саха Өрөспүүбүлүкэтин тас сибээһин сүрүннүүр биэдэмистибэлэр икки ардыларынааҕы сүбэ мунньаҕы бырабыыталыстыба бэрэссэдээтэлин бастакы солбуйааччы Алексей Стручков салайан ыытта.
edersaas.ru
– Арассыыйа Федерациятын Тас дойдуларга министиэристибэтэ норуоттар икки ардыларынааҕы сибээһи сүрүннүүр, көмөлөһөр буолан, Саха сирэ тас дойдулары кытары эргиэҥҥэ, экономика уонна култуура өттүнэн сибээскэ Уһук Илиҥҥэ биир дьоһун миэстэни ылар. Ол курдук, өрөспүүбүлүкэ ХНТ, ЮНЕСКО, Арктика Сэбиэтин, Хотугу Форум курдук норуоттар икки ардыларынааҕы тэрилтэлэри кытары үлэтэ ситимнээх буолла, үрдүк таһымҥа таҕыста. Итинэн Хотугулуу-Илиҥҥи Азия эрэгийиэннээҕи дьаһалтатын Ассоциациятыгар (АРАССВА-ҕа) 2019-2020 сылларга бэрэссэдээтэлинэн быйыл Саха сирэ талыллыбыта мээнэҕэ буолбата. Саха сирэ норуоттар икки ардыларынааҕы кэккэ бырайыактары олохтообута. 1994 сылтан «Азия оҕолоро» норуоттар икки ардыларынааҕы спортивнай оонньуулар алта төгүл ыытылыннылар. Быйыл сайын Дьокуускайга тэриллибит Норуоттар икки ардыларынааҕы I интеллектуальнай оонньууларга 18 дойдуттан 1,5 тыһ. оҕо кэлэн кыттыыны ылла, – диэтэ вице-премьер.
Салгыы Саха Өрөспүүбүлүкэтин сирин-уотун балаһыанньата Азия – Тиихэй акыйаан эрэгийиэнин дойдуларын кытары бииргэ үлэлээһини сайыннарарга бэрт тоҕоостооҕун бэлиэтээтэ. Бэрэсидьиэн Владимир Путин «2024 с. диэри Арассыыйа Федерациятын сайдыытын национальнай сыалларын уонна стратегическай соруктарын туһунан» ыйааҕын чэрчитинэн, өрөспүүбүлүкэ «Норуоттар икки ардыларынааҕы кэпэрээссийэ уонна экспорт» национальнай бырайыагы оҥорсо сылдьарын эттэ.
– Тас дойдулар министиэристибэлэрэ эрэгийиэннэргэ ураты болҕомтолорун уураллар. Эрэгийиэннэр Арассыыйа тас дойдулары кытары бииргэ үлэлээһини кэҥэтэллэр, дириҥэтэллэр. Онуоха Саха сирэ көхтөөх үлэтинэн инники күөҥҥэ сылдьар, – диэтэ бу министиэристибэ федерация субъектарын, парламены уонна уопсастыбаннай хамсааһыннары кытары үлэҕэ департаменын дириэктэрин солбуйааччы Андрей Демидов.
«Арассыыйа дипломаттарын ассоциацията» Бүтүн Арассыыйатааҕы уопсастыбаннай тэрилтэ бэрэссэдээтэлэ Игорь Халевинскай Дьокуускайга уон үһүс сылын үлэлиир Эдэр дипломаттар оскуолалара ыччат политическай култууратын үрдэтэргэ тирэх буоларын эттэ.
Салгыы Алексей Стручков Игорь Халевинскайы кытары бииргэ үлэлиир сөбүлэһиигэ илии баттаатылар. Түмүккэ Арассыыйа Тас дойдуларга министиэристибэтин Дьокуускайдааҕы бэрэстэбиитэлистибэтин, өрөспүүбүлүкэ Тас сибээскэ уонна норуоттар дьыалаларыгар министиэристибэтин үлэһиттэригэр Махтал суруктар туттарылыннылар.
Раиса СИБИРЯКОВА, «Саха сирэ» хаһыат, edersaas.ru
Хаартыскаҕа Мария Васильева (СИА) түһэриилэрэ