Тас дойдуттан сынньанан кэлбит Саха сирин 290 олохтооҕо дойдуларыгар кэлэн баран, бэйэлэрин бэрэбиэркэлэнэр ПЦР анаалыс туттарбатахтар. Бу туһунан «Якутия24» ханаал эрэгийиэн Роспотребнадзоругар ссыылкалаан иһитиннэрбит. Санитарнай-эпидемиологическай балаһыанньаны кэһии иһин эппиэтинэһэ суох олохтоохторго ыстараап көрүллүөн сөп. Ол курдук, 15-40 тыһыынча солкуобайга диэри физическэй сирэйгэ, 50-150 тыһыынча солкуобайга диэри дуоһунастаах сирэйгэ уонна 200-500 тыһыынчаҕа диэри юридическай сирэйдэргэ.
РФ сүрүн санитарнай бырааһа иһитиннэрбитинэн, тас дойдуттан кэлбит хас биирдии Арассыыйа олохтооҕо дьаҥҥа сыстыбытын дуу, суоҕун дуу бэрэбиэркэлиир ПЦР анаалыһы булгуччу үс хонук иһигэр туттарыахтаах. Анаалыһын түмүгэ биллиэр диэри хааччахтаныы эрэсиимин тутуһуохтаах.
Ульяна Захарова, «Саха сирэ» хаһыат, edersaas.ru