Кулун тутар 18 күнүгэр Арассыыйа бэрэсидьиэнин 144 дойдуга талаллар. Тас дойдуларга 2 мөлүйүөн кэриҥэ Арассыыйа гражданнара олороллор эбит. Кинилэргэ анаан 400-чэкэ быыбардыыр учаастактары арыйбыттар. Быйыл 2012 сыллааҕар ордук көхтөөх куоластааһын буолбут.
Прагаҕа Наука уонна култуура Арассыыйатааҕы киинигэр аһыллыбыт быыбардыыр учаастакка сарсыардаттан быыбардааччылар кэлэн барбыттара. Кыра оҕолорун кытта илдьэ кэлэн, үөрэ-көтө куоластыыллар. Күнүс онно улахан уочарат үөскүү сылдьыбыта. Венаҕа Арассыыйа гражданнара чааһы быһа уочараттара кэлэрин кэтэһэргэ тиийбиттэр. Таилаҥҥа хас да тыһыынча турист куоластаабыт. Лондоҥҥа посольствоҕа эрдэттэн эрийэн, ханна куоластыы кэлэр туһунан ыйыталаһаллар эбит.
Ол эрээри Украинаҕа Арассыыйа гражданнара куоластыылларын утарсарга быһаарыныы ылыммыттар. Былаас уорганнара эрдэттэн быыбарга кыттыбаттарын курдук сэрэтэн, погромнары, араас провокациялары оҥоруохпут диэн куттааталлар да, дьон син биир куоластыы кэлбит. Ол гынан баран, полиция Киев, Одесса, Харьков, Львов куораттарга дипломатическай бэрэстэбиитэлистибэлэргэ киирэр ааны бүөлээн, дьону киллэрбэтэх. Москваҕа итини киһи аан дойдутааҕы быраабын кэһии курдук сыаналаатылар.
Ангелина Васильева, “Саха сирэ” хаһыат, edersaas.ru