Тарьей Бё: “Калашников автоматын тутан турар курдук санаммытым”

Норвегия биатлониһа Тарьей Бё Рупольдиҥҥа (Германия) буолбут аан дойду Кубогар сприҥҥэ үрүҥ көмүс мэтээли ылары ситистэ. Маныаха киниэхэ сыалын биирдэ да сыыспатаҕа олук буолла.

edersaas.ru

“Матч-ТВ” биэрбит интервьютугар Тарьей Бё бэргэн ытыыларын “Илиибэр бинтиэпкэни буолбакка, Калашников автоматын тутан турар курдук санаммытым”, — диэн күлэ-оонньуу быһаарда.

Күрэс кыайыылааҕынан Йоханнес Бё буолла. Тарьей бииргэ төрөөбүт быраатыгар аҕыс сөкүүндэнэн хоттордо. Ньиэмэс Бенедикт Долль үһүс көрдөрүүлэннэ.

Билиһиннэрэн эттэххэ, отут саастаах Тарьей Бё Ванкувердааҕы Олимпиада чөмпүйүөнүнэн буолар, онтон Пхенчханнааҕы Оонньууларга үрүҥ көмүс мэтээли ылан турар. 2017-2018 сыллааҕы аан дойду Кубогын түмүгүнэн сэттис миэстэлээх.

Бу күрэскэ Александр Логинов кыайыылаахтан 26 сөкүүндэ хаалан, бэһис буолла.

Роман Попов, edersaas.ru

Хаартыска Интэриниэттэн ылылынна