“Якутзолото” холбоһук төрүттээччитэ Тарас Десяткин төрөөбүтэ 90 сылыгар өйдөбүнньүк дуосканы ыйаатылар. Бырабыыталыстыба бэрэссэдээтэлин бастакы солбуйааччы Михаил Осипов Тарас Десяткин уонна кини үлэтин туһунан истиҥник аҕынна.
“Өрөспүүбүлүкэ социальнай-экономическай сайдыыта бырамыысыланнас сайдыытыгар олоҕурар. Оттон бу бөдөҥ треһи Тарас Десяткин тэрийбитэ. Кини салайбыт 20 сылыгар 670 тонна кыһыл көмүс хостоммута”, — диэтэ Михаил Осипов.
“Якутзолото” салайааччытын туһунан кыһыл көмүс бырамыысыланнаһын бэтэрээнэ Владимир Кычкин аҕынна: “Тарас Десяткин – кыһыл көмүс бырамыысыланнаһын тэрийбит улуу киһи”.
Кини 70 тыһыынча киһи үлэлээбит хампаанньатын салайбыта.”
Маны сэргэ, Тарас Десяткин аата Дьокуускайдааҕы бырамыысыланнас техникумугар иҥэрилиннэ.
Бу дьыл олунньу 14 күнүгэр 90 сааhыгар сылдьан улахан тэрийэччи, промышленник Тарас Десяткин күн сириттэн күрэммитэ.
ЫСПЫРААПКА:
Тарас Десяткин «Якутзолото» хампаанньаны 1972-1991 сс. салайбыт. Бу кэмҥэ көмүс хостооһуҥҥа улахан көрдөрүүнү ситиспиттэр. Депутатскайдааҕы хорҕолдьуну хостуур комбинат, Сарылахтааҕы хайаны байытар комплекс үлэтин саҕалаабыт.
Муус устар 26 күнүгэр Тарас Десяткин 90 сааһын туолуох этэ. 1928 с. Мэҥэ Хаҥалас Төҥүлүтүгэр төрөөбүт. Магаданнааҕы хайа техникумун, Ленинградтааҕы хайа университетын бүтэрбит. 1953 сыллаахтан «Кизелуголь» (Пермь) треһин «Капитальная» шахтатыгар салайааччы көмөлөһөөччүтүнэн, онтон салайааччынан, Иркутскай уобаласка Черемховскайдааҕы таас чох сиригэр үлэлээбит.
1955 сыллаахтан Саха сирин промышленноһыгар: хайа маастарынан, Кангласскайдааҕы таас чох руднигар сүрүн инженеринэн, Саха АССР миниистирдэрин сэбиэтин иһинэн ититии бырабылыанньатын сүрүн инженеринэн, Дьабарыкы Хайа шахтатын бырабылыанньатын салайааччытынан, «Алданслюда» комбинатын Эльконка руднигын сүрүн инженеринэн үлэлээбит.
1961 сыллаахтан «Мирный» рудник «Якуталмаз» треһин сүрүн инженерэ.
1969 сыллаахтан «Якуталмаз» дириэктэрин солбуйааччы.
1972-1991 сс. «Якутзолото» солбуйааччы.
1991 с. – «Золото Якутии» хампаанньа дириэктэрэ.
Социалистическэй үлэ дьоруойа, ССРС Үрдүкү Сэбиэтин дьокутаата, КПСС XXV съеһин кыттааччыта, Ленин уордьанын икки төгүллээх лауреата.
Саха ССР үтүөлээх горняга, РСФСР үтүөлээх металлура.
СӨ бочуоттаах олохтооҕо.
Золото, алмазы и моя жизнь», «Люди, золото, алмазы…» кинигэлэр ааптардара.
Тарас Десяткин аата 66,37 караттаах алмааска иҥэриллибитэ.
Николай Попов, edersaas.ru