Таптаспыт киһи эйигинниин уҥа-таала умайа, Эн миэнэ буолуохтаах этиҥ. Билигин ол ааспыт сыллар быыллыйбыт быыстарын арыйан, бу киэһэ мин сүрэҕим эмиэ эйиэхэ курдаттыы тардыста. Билэбин эн билигин бу суругу ааҕаргын… уонна сэрэйэргин, мин киммин. Көр ээ, мин харахтарбын утары уонна аах хайдах курдук кинилэр эйигин умсугуйа көрөллөрүн, хайдах курдук тупсубуккун хайгыылларын. Эйигин эрэ ыҥыралларын… Эн сэрэйбэтэх буолбатаххын, эн курдаттыы билэҕин уонна тоҕо эрэ толлоҕун, ыйытыаххын, чугаһыаххын уонна кэпсэтиэххин. Эн иннигэр кырынаастыы мөхсөр, кычыкылана күлэр кыыс оҕо да буолбатарбын, орто туруу дойдуга дьахтар буолар ытык аналбын атыҥҥа анаатарбын даҕаны …. Аатырбыт поэт эппитинии, алдьаммыт да сибэккиттэн астыныы мүөтүн иһиллэр эбээт! Эн күүстээх илиигин имэрийэ кууһан ылан, хаҥыл бэйэҕин сылаас түөспэр сыһыары тардан, сыллыы-ууруу сытыахпын…
Хас биирдии тыгыалыыр тымырыҥ устун тыргылла сүүрэр итии хааҥҥар тапталым кытыастар кыымнарын ыһыахпын… Хааҥҥын оонньотон, төлөнүнэн кыыһан, санааҕар саһан… Хорсун бэйэҥ хотторон, бэтиэхэлээх бэйэҥ бэринэн, уолан уостаргар сиппит дьэдьэннии минньигэс уостарбын даҕайыахпын, нарыннык уураан уулларыахпын… Аньыылаах ырай аанын тэлэччи арыйан илбистээх имэҥҥин тилиннэриэхпин, инчэҕэй эппинэн эриллэ түһүөхпүн… Сыһыаҥҥын сылытан, имэҥҥин ириэрэн, тиргэҕэ иҥнибит кус оҕотун курдук өрө мөхсө сытыахпын. Ууруур уоһуҥ кутаатын суоһуттан уҥа-уҥа тиллиэхпин, өрүкүйэ умайар уоттаах таптал умсулҕаннаах түгэниттэн өрүсүһэ-өрүсүһэ таптыахпын, өйдөнө-өйдөнө сүтүөхпүн баҕардым. Эн бэйэлээх эр бэрдэ иирэ талахтыы имигэс бэйэбин имитиэххин, харыстаабакка хаһыытатыаххын, атаҕастаабакка айыкалатыаххын, бу түүн миэхэ астыныы амтанын амсатыаххын…. Аттыгар суохпун эрээри өрүү эн таскар баарбын… Санаабынан… Хас биирдии хамсаныыгын өйбөр оҥорон көрөбүн, харахпар хартыына курдук хатыыбын. Күн сиригэр күүппүт күндү киһим эн эбиккин. Олоҥхо дойдутун Үрүҥ Уолана, Ньургун Боотура. Хаҥыл сүрэҕиҥ харааста таптыыр кэрэ куота хаһан да буолбаппыттан хаанынан ытыыр хотун сүрэхпин уоскута сатыырым кыаллыбат… Саатар биирдэ көрбүт киһи эйигин чугастан… Күлэргин истибит киһи илэ… Биирдэ кууспут киһи ыга… Уураан ылбыт киһи умсугуйа… Таптаспыт киһи эйигинниин уҥа-таала умайа… Баары барытын умна-тумна…
ХАРАҤАЧЧЫ.