Тапталлаах аҕа, эһээ өрүү Кыайыы аргыстаах

Ааптар: 
Бөлөххө киир:

Бүгүн Аҕа күнүгэр биһиги дьиэ кэргэннэрбит эрэллээх эркиннэрин, тирэх, күүс-көмө буолар дьоммутун — олохпут аргыстарын, аҕаларбытын, эһээлэрбитин чиэстиир күммүт.

edersaas.ru

Бу бэлиэ бырааһынньык күҥҥэ эйэлээх дьиэ кэргэн аҕа баһылыга, тапталлаах сиэннэр маанылаах эһээлэрэ Василий Винокуров дьиэ кэргэнигэр бэртээхэй бэлэҕи уунна. Кини «спорт», «тустуу» диэн баран муннукка ытаабыт киһи. Төһө да бочуоттаах сынньалаҥҥа олордор, Василий Егорович араас спортивнай күрэхтэһиилэргэ кыттан тэйэр.

Бэҕэһээ, муус устар 6 күнүгэр, 3 №-дээх Оҕо спортивнай оскуолатыгар ХИФУ (СГУ) профессора, ССРС спордун маастара, Саха АССР үтүөлээх тренерэ Николай Алексеев-Матбор бирииһигэр бэтэрээннэргэ өрөспүүбүлүкэ чөмпүйэнээтэ, ону тэҥэ Үлэ Кыһыл Знамятын, Бочуот Знага уонна Партийнай килбиэн уордьаннар кавалердара, ССРС, Саха АССР спордун маастара Максим Сибиряков бирииһигэр хапсаҕайга турнир буолан аастылар.  Василий Винокуров 62 кг ыйааһыҥҥа киирсэн, икки тэрээһиҥҥэ иккиэннэригэр тэҥҥэ кыттан, төрөөбүт Өймөкөөнүн улууһун чиэһин көмүскээтэ.

Буолаары буолан, икки суолталаах тэрээһиҥҥэ субуруччу Кыайыы өрөгөйүн биллэ!

Василий Винокуров 32 сыл спорт эйгэтигэр үлэлээбитэ. Оскуолаҕа тустуу тренерэ уонна физкультура учуутала буолан, үгүс ыччаты спорка уһуйбута. Педагогическай үлэ бэтэрээнэ күн бүгүҥҥэ диэри үөрэппит оҕолоруттан махтал тылларын истэр дьоллоох киһи. Хапсаҕайга спорт маастара. Көҥүл тустууга спорт маастарыгар хандьыдаат. Өрөспүүбүлүкэҕэ хары баттаһыыга чөмпүйүөн. Күрэхтэһиилэргэ өрүү Өймөкөөнүн аатын дорҕоонноохтук ааттатар.  Былырыын бэтэрээннэргэ ити үөһэ ааттаммыт күрэхтэһиилэргэ 2-с уонна 3-с миэстэлэргэ тиксибитэ. Ол көрдөрүүтүн тупсаран, быйыл чөмпүйүөн бочуоттаах аатын сүктэ.

Василий Егорович «Өймөкөөн улууһун бастыҥ бэтэрээн спортсмена»  диэн номинацияҕа бэлиэтэнэн, анал Бочуот кырааматанан уонна булт маҕаһыынын сэртипикээтинэн  наҕараадаламмыта. Маны таһынан «2018 сыл бастыҥ спортсмена» анал бэлиэ хаһаайына.  Буолан ааспыт суолталаах күрэхтэһиигэ тэҥҥэ сылдьыбыт, аттыгар сылдьан өйөбүл буолар киһитэ, тапталлаах кэргэнэ Тамара Винокурова санаатын бу курдук үллэстэр:

Күрэхтэһии кэмэнтээтэрэ Валерьян Неустроев бэтэрээн-спортсмен  тустар тиэхиньикэтин кэтии олорон: «Күрэхтэһиибитин дэгиттэр кыахтаах, Тымныы полюһа Өймөкөөн чысхаан тымныытыгар уһаарыллан тахсыбыт тустуук Василий Винокуров олус да киэргэттэ!» — диэн бэрт үрдүк сыанабылын истэн, аҕабытынан наһаа да киэн тутта санаатым!

Аҕа күнүн көрсө дьиэтигэр Кыайыы көтөллөнөн киирбитэ — биһиэхэ, кини дьиэ кэргэнигэр, тугунан да сыаналаммат олус үрдүк наҕараада.

Сынньанан баран, аҕабыт суол сабыллыан иннинэ, тапталлаах, ахтар Өймөкөөнүгэр аны күһүҥҥэ диэри сайылыы барыаҕа. Онтон мин уу суола аһылыннаҕына, киниэхэ тиийиэм. 

Күөх Ньурба кыыһа Тамара Петровна эдэркээн сааһыгар Өймөкөөн нэһилиэгэр нуучча тылын учууталынан анатан тиийэн, олоҕун аргыһын, тапталлаах кэргэнин, физкультура учууталын Василий Винокуровы көрсөн, ыал буолбуттара. Билигин кини иккис дойду оҥостубут Өймөкөөнүн олус таптыыр, ахтар. Винокуровтар кыһын кэлэн оҕолоругар сиэннэрин  көрсөллөр, сайынын дойдуларыгар, Өймөкөөҥҥө сайылыыллар. Онон куоракка олорор кэмнэригэр Винокуровтар уопсастыбаннай уонна спортивнай олох үөһүгэр сылдьаллар.

Аҕа күнүгэр ситиһии көтөллөнөн, Кыайыы сырдык дьаралыгар куустарбыт Василий Винокуров дьиэ кэргэнин эрэ буолбакка, биир дойдулаахтарын барыларын үөртэ. Спорт бэтэрээнигэр: «Өссө да чөмпүйээнээттэргэ, турнирдарга кыттан, бу курдук төрөөбүт  улуускун дорҕоонноохтук ааттата сырыт дуу», — диэн алҕаатахпыт буоллун!

Елена ПОТОЦКАЯ, «Cаха сирэ» хаһыат, edersaas.ru

Хаартыскаҕа — Тамара Винокурова түһэриитэ.

+1
0
+1
0
+1
0
+1
0
+1
0
+1
0
+1
0