Бастыҥ ыаллар мэтээлинэн наҕараадаланнылар

Ааптар: 
Бөлөххө киир:

Бүгүн Дьиэ кэргэн, таптал уонна бэйэ-бэйэҕэ бэриниилээх буолуу күнүгэр, киин куорат ЗАГС дьиэтигэр Мэҥэ Хаҥалас, Горнай, Нам улуустарыттан уонна Дьокуускай куораттан 50 сылтан үөһэ бииргэ олорбут 12 дьиэ кэргэни чиэстээтилэр. 

СӨ Үлэҕэ уонна социальнай сайдыыга миниистирэ Елена Волкова быйыл РФ Бэрэсидьиэнэ Владимир Путин бу күнү дьиэ кэргэн үгэс буолбут сыаннастарын харыстыыр, ыччаты духуобунай сиэргэ-майгыга иитиини күүһүрдэр соруктаах официальнай бырааһынньык быһыытынан бигэргэпптин туһунан этэн туран,  «Быйылгы сыл Саха сиригэр Ийэ сылынан биллэриллибитэ. Онон бары тэрээһиннэр дьиэ кэргэн туругун тупсарыыга туһуланаллар» диэн бэлиэтээтэ.  Саха АССР төрүттэммитэ 100 сылыгар анаан 100 бастыҥ дьиэ кэргэн «Таптал уонна бэриниилээх буолуу» Арассыыйатааҕы анал мэтээлинэн наҕараадаланнылар. Бары муниципальнай тэриллиилэргэ үөрүүлээх тэрээһиннэр ыытылла тураллар.

Миниистир Мэнэ Хаҥалас Павловскайыгар 62 сыл бииргэ олорбут ытык ыала Николай уонна Тамара Карповтарга (5 оҕолоохтор, 14 сиэннээхтэр,10 хос сиэннээхтэр), Мэҥэ Хаҥалас улууһун Үөһээ Бэстээх бөһүөлэгэр  61 сыл олорбут Дмитрий уонна Мария Наумовтарга (3 оҕолоохтор, 8 сиэннээхтэр, 5 хос сиэннээхтэр), Горнай улууһун Бэрдьигэстээх сэлиэнньэтигэр 53 сыл  (4 оҕо, 9 сиэн, биир хос сиэн) олорбут Иннокентий уонна Екатерина Егоровтарга «Таптал уонна бэриниилээх буолуу» мэтээлин туттарда.
Маннык мэтээлинэн Нам улууһун Бөтүҥүттэн, Хамаҕаттатыттан, Горнай улууһун Дьиикимдэтиттэн, Хаҥалас Төхтүрүттэн уо.д.а улуустартан, Дьокуускай куораттан иллээх дьиэ кэргэттэр наҕараадаланнылар.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0