Бүлүү куорат биир маҕаһыыныгар киирэн баран, “ВПБ” ол эбэтэр “Вилюйское постельное белье” диэн дьарылыктаах утуйар таҥаска хараҕым хатаммыта.
edersaas.ru
Атыылааччыттан: “Бүлүүгэ утуйар таҥаһы тигэллэр дуо?” – диэн интэриэһиргээбиппэр, миигин “Комфорт” хааччахтаммыт эппиэтинэстээх тэрилтэ салалтатын кытта тиийэн кэпсэтэрбэр сүбэлээбитэ. Эппит аадырыстарын булан, предприниматель Жанна Соколованы кытта көрсөн кэпсэппитим. Интервьюбун Жанна Револьевна аатыттан тиэрдэн, түһүмэхтэргэ арааран сырдатыым.
Атахха туруу бастакы олуга
Утуйар таҥас тигиитигэр бэйэ дьыалатын аһан баран, саҥа суолун тэлэн эрэр предприниматель бастакынан улуустааҕы үөрэх управлениетыттан оҕо саада, оскуола, интэринээт испииһэгин көрдөөбүтүм.
Ол кэнниттэн тэрилтэлэри барыларын кэрийэ сылдьан, үлэм хайысхатын быһаарбытым. Биһиэнэ хлопок таҥас буолан, киһи этин кыһыппат, иирэ-тиирэ бара сылдьыбакка, эккэ үчүгэйдик сыстар, киһи тириппит уутун оборон ылар. Тэрилтэбин тэриниэм иннинэ таҥас (хлопок, бязь, сиитэс, лүөн) арааһын, киһи этигэр-сиинигэр хайдах дьайалларын сиһилии үөрэппитим.
Ис дьыала отделыгар полиция майорунан, онтон олох-дьаһах коммунальнай хаһаайыстыбатыгар үлэлээбитим. Иистэнэрбин сөбүлүүр буолан, бэйэ дьыалатын тэринэргэ уһуннук толкуйдуу барбакка, иис көрүҥүнэн сайдарга санаммытым. Билигин тэрилтэбэр 6 үлэһиттээхпин.
Нууччалыы эттэххэ, анал “профессиональнай” дэнэр иистэнэр массыыналары Ивановаттан сатыылаһан аҕалбыппыт. Иистэнэр сыахха үс иистэнньэҥнээхпин.
Иистэнэр сыах фабрикаҕа тиийэ улаатыа дуо?
Былырыын киирбит саҥа дьиэлэбигэр сакаастара улаатан, тэрилтэ билиҥҥи дьиэтэ кыараан эрэр.
Иистэнэр сыах уонна маҕаһыын бииргэ тураллар. 2017 сылга эрдэттэн хаһаанан сакаастаабыт матырыйаалбыт бүтэн эрэриттэн, эбии сакаас оҥордубут. Онон тэрилтэ кыаҕыран, атыылаһааччы билиниитин ылынан эрэрэ бу да холобуртан көстөр диэхпин сөп. Инники былааммыт сүҥкэн. Ол курдук, сир ылан баран, иистэнэр сыах туттуохпутун баҕарабыт. Манна утуйар таҥастан ураты, оҕо уонна улахан дьон таҥаһын, түннүк уонна миэбэл сабыыларын, онтон да атын сакаастары тигэр анал тус-туспа иистэнэр сыахтары аһыахпыт.
Кэнэҕэс бэйэбит бородууксуйабытын Бүлүү куоратыгар эрэ буолбакка, ыаллыы сытар улуустарга, киин куоракка батарыахпыт. Билигин Үөһээ Бүлүү тэрилтэлэрин кытта сибээһи олохтоотубут. “Татыйыына” диэн Сунтаар улууһугар баар маҕаһыын салалтатын кытта кэпсэтии ыыттыбыт. Онон, сыыйа сайдан истэхпит аайыфабрика да туттар санаа киириэ.
Табаар суута – тэрилтэ сирэйэ
Ханнык баҕарар бородууксуйа ураты табаарынай сирэйдээх эрэ буоллаҕына атыылаһааччытын хамаҕатык булар.
Биһиги табаарбыт орто хамнастаах дьоҥҥо туһаайыллар. Онон кытай ырыынагар атыыланар утуйар таҥас кэмбилиэгиттэн сыаната ыарахан. Хаачыстыбата да онно эппиэттиир. Ол эрээри аатырбыт фирмалартан сыаната чэпчэки. Анаан үөрэтэн көрүүбүнэн, аатырбыт омук фирмалара сүрүннээн утуйар таҥас суутугар уонна хаатыгар болҕомтолорун ууран, табаар сыанатын эбэллэр эбит. Ол иһин толкуйдаан баран, урукку сэбиэскэй саҕанааҕы кумааҕы сууну туһанарга санаммытым. Дьокуускайдааҕы 1 №-дээх типографияны кытта дуогабардаһан баран, бэйэбит иистэнэр сыахпыт логотибын оҥотторон, бэртээхэй сууну толкуйдаатым.
Былырыын Саҥа дьылга дизайнер хараҕынан көрөн, утуйар таҥас суутугар олохтоох бэспит туораахтарын укпуппутугар, табаарбыт хамаҕатык атыыга барбыта. Сайдан истэххэ, киһиэхэ араас толкуй киирэр эбит. Фирменнэй дьаралыкпытын араас холобуру үөрэтэн баран, “Вилюйское постельное белье” диэн ааттаабыппыт. Онно сыанатын эрэ буолбакка, биһиги тэрилтэбитин ханнык аадырыстан булуохха сөбүн, электроннай почтабытын, батсааптаах суотабай нүөмэрбитин, инстаграммытын ыйбыппыт. Ол эбэтэр биһиги бородууксуйабытын интэриэһиргээбит дьон хаһан баҕардахтарына буан ылыахтарын сөп.
ЭКСПО саҥа толкуйу сахта
Киһи кыаҕа сайдарыгар, бэйэтин ылысыбыт дьыалатын сайыннарарыгар ЭКСПО курдук предпринимателлэргэ анаммыт быыстапкалар олус туһалаахтар эбит.
Саҥа дьыала тэриммитим сылтан ордук ааста. Бу кэм устата биир сиргэ олорбокко, уопут атастаһан, бородууксуйабын батарар сири көрдөөн, Үөһээ Бүлүүгэ, Сунтаарга, Дьокуускайга сырыттым. Миэхэ ЭКСПО быыстапка олус элбэҕи биэрдэ. Онно сылдьан бэрт үгүс сибээһи олохтоотум. Ол курдук, Дьокуускай куораттан уонна Ньурбаттан эмиэ утуйар таҥаһы тигэр дьону кытта билистим. Бэйэ-бэйэбитигэр сылдьыһан, уопуппутун атастаһыах буоллубут. Хараҕым уоттанан кэлэн, кыргыттарбар кэпсээн, бу күһүҥҥүттэн ыла үлэбит өссө тэтимирдэ, айар-тутар баҕабыт улаатта.
Бэйэ бородууксуйатын батарыыга сонун көрүү
2016 сылтан 600 кэмбилиэги тиктибит. Бу биһиэхэ улахан көрдөрүү.
Оҕо саадтара элбэх буолан, 100-түү кэмбилиэги сакаастыыллар. Иистэнэр таҥаспытын Иваново куораттан атыылаһабыт. Таҥас араастаах, арыый сыаналаах да буоллар, хаачыстыбалааҕы ылабын. Кытай ырыынага конкуренциялаах да, номнуо биһиги бэйэбит килийиэннэрдээхпит. Социальнай ситимнэргэ, инстаграмҥа, ватсапка анал бөлөхтөрү тэрийдибит. Аны интернеккэ бэйэбит сайтпытын аһаары сылдьабыт. Бу күннэргэ тэрилтэбит туһунан кыракый роликтары оҥорон таһаарыахпыт. Куоракка тиийэ сылдьан араадьыйаҕа уонна телевидениеҕэ сылдьан реклама сыанатын кытта билсибитим. Онон сыыйа үппүтүн мунньан бэйэ рекламатыгар үлэлэһиэхпит.
Ити курдук, Бүлүү куоратын атаҕар туран эрэр предпринимателэ былаана киэҥ, сарсыҥҥыта – кэскиллээх.
Елена ПОТОЦКАЯ, «Саха сирэ» хаһыат, edersaas.ru