«Таммахтарга» — Эрчимэҥҥэ  анаммыт ыһыах

Ааптар: 
Бөлөххө киир:

Мэҥэ Хаҥаласка «Таммахтар» Эрчимэҥҥэ  анаммыт ыһыаҕы ыспыттарын туһунан манна ааҕыҥ.

Самаан сайыммыт уйгулаах ыһыахтара өссө да бүтэ иликтэр. Бэҕэһээ Мэҥэ Хаҥаласка Ураһалаах эбэҕэ «Таммахтар» айар холбоһук ыһыах ыста. Күммүт да талбыт курдук эриэккэс күн буолла!
Вера Гоголева — Айылык аал уотун аһатан, айах тутан үрдүк айыыларга сүгүрүйдэ, алгыс эттэ. Ойуокайдаан ойдубут, эһиэкэйдээн тэйдибит! Ыһыахпыт уран тыл маастара, биллиилээх кириитик Шестаков Егор Петрович — Эрчимэн 95 сааһыгар ананна. Күндү маанылаах ыалдьыттарбыт: Эрчимэн олоҕун аргыһа Кардашевская Александра Николаевна — Харыстаана, саха поэзиятын Далбар Хотуттара Саргы Куо, Умсуура, Сэгэлдьийэ Чээлэй, хоһоонньут, ырыа айааччы, Намнааҕы «Отуу уота» айар түмсүү салайааччыта Аскалон Егоров, оҕо суруйааччыта, «Таммахтар» ытык сүбэһиппит Көстөкүүн Суосун.
Сандалы тула олорон күндү ыалдьыттарбыт тылларын-өстөрүн , эҕэрдэлэрин иһиттибит. Александра Николаевна үөрэн-көтөн, долгуйан туран, Эрчимэн оҕо сааһын, олоҕун, айар үлэтин туһунан кэпсээтэ. Улуу кириитик туһунан урут истибэтэхпитин иһиттибит, билбэтэхпитин биллибит. Чахчы даҕаны олох араас эриирин-мускуурун , «атаантан самныыны, кырдьыкка кыайыыны, түһүүнү тахсыыны» билбит эбит Эрчимэн убайбыт! Ону барытын эр санаатынан, бөҕө дьулуурунан, эрэллээх доҕоттор өйөбүллэринэн, уоттаах таптал угуттааһынынан кыайбыт эбит!
Моҕол балаҕан иһигэр Эрчимэн сырдык санаа кыымынан ыһыахтанар хомоҕой хоһооннорун аахтыбыт, уран тыл умсулҕаныгар умсан ыллыбыт! «Эрчимэн ааҕыыларын» кыайыылаахтарынан Инна Николаева, Мария Кылабысова, Елена Прокопьева буоллулар
Ыһыахпыт түһүлгэтин Аскалон Егоров иэйиилээх ырыаларынан, Антон Борисов араас үнүстүрүмүөннэр алыптаах дорҕооннорунан киэргэттилэр.
«Таммахтар» куруук бииргэ алтыһар доҕотторо: хаалыктаах хаамааччылар, үһүс оскуола үөрэнээччилэрэ эмиэ эҕэрдэ тылларын эттилэр, талааннарын көрдөрдүлэр.
Уран тыл маастара, биллиилээх кириитик Эрчимэн 95 сааһыгар анаммыт айар куттаахтар ыһыахтара табылынна, сыалын ситтэ! Күндү ыалдьыттарбытыгар уонна ыһыаҕы тэрийбит, салайбыт дьоммутугар Августина Владимироваҕа, Наталья Пахомоваҕа, Мария Кылабысоваҕа махталбытын тириэрдэбит!

Елена Прокопьева, уопсастыбаннай кэрэспэдьиэн.

+1
0
+1
0
+1
0
+1
0
+1
0
+1
1
+1
0