«Тамма» кэпэрэтиип сүөһүтүн үс сиринэн сайылатта

Ааптар: 
Бөлөххө киир:

Мэҥэ Хаҥалас улууһун Чыамайыкы нэһилиэгэр тыа хаһаайыстыбатын эргийэр киинэ ‒ «Тамма» кэпэрэтиип буолар.

Кэпэрэтиип хас да көрүҥ үлэни-хамнаһы тэрийэн, кытыы сытар дьоҕус нэһилиэк олохтоохторун наадыйыыларын толору хааччыйар. Улуус уһук нэһилиэгин олоҕор-дьаһаҕар улахан суолталаах бу хаһаайыстыбаны Егор Дьячковскай 2014 сылтан салайар. Быйыл сайын кэпэрэтиип үс сайылыгынан тигинэччи үлэлээтэ. Ол курдук, Ат Күөлэ, Алаас уонна Дьаҥха Үрүйэтэ сайылыктарга кэпэрэтиип иһинэн үүт туттарааччылар ынахтарын ыыллар. Алааска үс бааһынай хаһаайыстыбаҕа 60-тан тахса ынах ыанар, Ат Күөлүгэр үс бааһынай хаһаайыстыба холбоон 30-ча ыанар ынахтаахтар.

Кэпэрэтиип салайааччыта Егор Дьячковскай Петр Федоровы кытары

Бөһүөлэккэ киириигэ кэлбит дьону саҥа сырдык өҥнөөх титиигинэн көрсөр Дьаҥха сайылык былырыын үлэҕэ киллэриллибитэ. Титииги тутууга олохтоохтор биригээдэлэрэ: Егор Дьячковскай бэйэтэ, быраата Эдгар Дьячковскай (электроуот ситимигэр), Александр Прокопьев, Александр Дьячковскай, Халыматтан төрүттээх күтүөт Андрей Сазонов үлэлээбиттэрэ. Матырыйаалыныын, уотунуун, тутуутунуун 300-кэ тыһыынчалаах үлэ барбыта биллэр. Титиик уратытынан баҕаналара сыбаайа эмиэ буолан туралларын ыйыахха сөп. Муостата ити баҕаналар аллараа аҥаардарынан.

Кэпэрэтиип сайылыгын толору хааччыллыылаах титиигэ

Титиик иһэ ыраас, ынахтар ыыр аппарааттарга уочаратынан киллэриллэн иһэллэр. Ыраас, сылаас үүт мээрэйдиир иһиккэ суккулла кутуллар. Аппарааттар тыастарыттан ураты оннук туспа тыас-уус суох, ынахтар да маҥыраспаттар. Үлэлии үөрүйэх ыанньыксыттар түргэн-түргэнник туттан, ынахтары ыы-ыы биир аанынан таһааран, нөҥүө аанынан саҥалары киллэртээн иһэллэр. Биһиги сылдьыбыт күммүтүгэр иллэрээ сыл ылбыт үүт таһар «УАЗ» массыыналара кыратык алдьанан, үүтү бэйэлэрин массыыналарынан астыыр сыахха таһа сылдьаллара.

‒ Манна икки бааһынай, мин быраатым Николай Федоров уонна Василий Романов, хаһаайыстыбаларын ыанньыктара бааллар, ‒ диир Петр Петрович. ‒ Үүттэрин кинилэр нөҥүө туттарар ыаллар ынахтара ыаналлар. Барыта 21 ынаҕы ыыбыт. Сарсыарда 5 аҥаар чаастан саҕалаан уонна киэһэ эмиэ 5 чааска. Бостуукпут Егор Явловскай ынахтары кэмигэр үүрэн аҕалар, ыамы хойутаппат.

Майаттан Аркадий Иннокентьев, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0