Тамара салпыакката интэриэһи тарта

Ааптар: 
Бөлөххө киир:

В.П.Ларионов аатынан Майа орто оскуолата биисинэс-инкубатор уонна агропрофилированнай хайысханан үлэлиир. Онон оҕону биисинэс эйгэтигэр кыра сааһыттан сыһыарарга ирдэбил турар, усулуобуйа тэриллэр.

Соторутааҕыта бу оскуола 4 «В» кылааһын үөрэнээччитэ Тамара Сыдыкбекова экологическай бородууксуйаны оҥорон таһаарбытын туһунан инстаграмҥа кэпсээбитин үгүс киһи интэриэһиргээтэ.
Кылаас салайааччыта Ираника Никитинаттан бу бэрт интэриэһинэй үлэ туһунан ыйыталастым. Онуоха Ираника Николаевна бу курдук кэпсээтэ:
«Бу оскуолаҕа быйыл үлэлии кэлбитим. «Анал ыйыллыбыт хайысхаларга үлэлэһиэхтээхпин» диэн санааттан уонна биһиги оскуолабыт тэрийэн ыытар Арассыыйа таһымнаах «Ларионов ааҕыылара» научнай кэмпириэнсийэҕэ оҕолорбун кытыннараары бу тиэмэни толкуйдаабыппыт. Тамара Сыдыкбекова олус сэргэх, кыһамньылаах үчүгэй үөрэнээччим. Күһүҥҥүттэн дакылаат суруйарга былааннаммыппыт. Сөп түбэһэр идиэйэ, тиэмэ киирэн биэрбэккэ, бу үлэни тохсунньу ортотуттан саҕалаабыппыт.
Бу үлэ олоххо киирэригэр киинэ көмөлөстө диэххэ сөп. Тамара «Мусор” диэн документальнай киинэни көрөн баран, «чахчы маннык дуо?» диэн соһуйбут этэ.
Онтон «дьэ тугу гыннахха, бөҕү-сыыһы хайдах аҕыйатыахха сөбүй?» диэн толкуйдаан барбыта. Үөрэнээччибинээн кэтээн көрбүппүт, биһиги наһаа элбэх полиэтилен бакыаты туттар эбиппит. Бу полиэтилен сүүһүнэн сыл сытар.
Бу оннугар элбэхтэ туттуллар салпыакканы сүбэлиибит. Оҕуруот аһын, фруктаны, сыыры, килиэби уонна аһылыгы бүрүйэргэ туттуохха сөп. Туттан баран, тымныы уунан сайҕыыгын. Маннык салпыакка сыл эбэтэр онтон уһуннук туттуллуон сөп.
Салпыаккаҕа икки эрэ матырыйаал наада — ыҥырыа буоската уонна таҥас. Маны куорат маҕаһыыннарыттан булуохха сөп. Мин үөрэнээччим иннигэр бастакы соругу туруорбутум: «Туһалааҕы оҥорон таһаар, табылыннаҕына кыттыахпыт», — диэн. Тамара туохха барытыгар олус кыһамньылаах, эппиэтинэстээх буолан, соругун толордо. Кини элбэхтэ туһаныллар салпыакка онорон таһаарда. Бородууксуйатын барытын өссө биир суукка иһигэр атыылаан бүтэрдэ! Инстаграмы, социальнай ситимнэри туһанан рекламатын ыытта. Дьоҥҥо сүбэлээн, айылҕа харыстабылыгар бэйэтин кыра кылаатын киллэрдэ. Ону таһынан, бастакы үп-харчы киллэринэн, үөрүүтэ үксээтэ. Онон НПК-аҕа үлэбитин түмэн кыттыахпыт. Оҕо маннык хабааннаах үлэтэ ситиһиилээх буоларыгар төрөппүт оруола улахан. Тамара ийэтэ Мотрена Иннокентьевна — олус көхтөөх, интэриэстээх төрөппүт. Биһиги бары бу маннык кыраттан саҕалаан, айылҕабытын харыстыыр туһугар кыһаллыахпытын наада, — диэн санаатын үллэһиннэ учуутал.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0