Бүгүн, сэтинньи 11 күнүгэр, «Саха» НКИХ ханаалын «Талбан» биэриитигэр коронавирус дьаҥын, эмп тарҕаныытын тула кэпсэтиилэр салҕаннылар.
Эпииргэ Кэбээйи улууһугар коронавирус дьаҥыгар сутуллуу туругун туһунан улуус баһылыгын бастакы солбуйааччы Александр Сивцев кэпсээтэ:
— Коронавирус дьаҥа Кэбээйи улууһугар эрэ буолбакка, бүтүн Арассыыйаҕа, аан дойдуга тарҕаныыта элбээн иһэр. Оттон биһиги улууспутугар ыарыы элбээбитэ кыһыҥҥы суол арыллан, барыы-кэлии элбээбитин кытта ситимнээх дии саныыбыт. Итиэннэ дьаҥ-дьаһах турар кэмэ буолан, ыарыы эмиэ тарҕаныан сөп.
Улуус суһал ыстааба быһаарбытынан, улахан муҥхалары тохтоппуппут. Арай, тэрилтэлэр бэйэлэрин истэринэн муҥхалыахтарын сөп диэн быһаарыллыбыта.
Кэбээйи улууһугар барыта 42 киһи коронавирус дьаҥыттан эмтэнэр: 37 киһи амбулаторнайдык, 5 киһи балыыһаҕа.
Оройуоннааҕы киин балыыһаҕа коронавируһу бохсор салааҕа 24 куойка, оттон инфекционнай салааҕа 10 куойка бааллар. Атын нэһилиэктэргэ быраас амбулаториялара, ФАП-тар үлэлииллэр. Оттон чуолаан коронавируһу эмтиир салаа Сангаарга оройуон балыыһатыгар эрэ баар. Улаханнык ыалдьыбыт дьону санрейсинэн манна аҕалабыт. Онон, дьаҥтан эмтэнэр кыах баар.
Билигин балыыһаларга икки ыйга тиийэр эмп баар. Улуус салалтатын сайаапкатынан кэмигэр хааччыллыы оҥоһуллар. «Сахафармация» аптекалара икки улахан нэһилиэккэ — Кэбээйигэ уонна Сангаарга бааллар. Манна диэн эттэххэ, нэһилиэктэр бэйэ-бэйэлэриттэн тэйиччилэринэн сибээстээн, эминэн хааччыллыы уустук соҕус.
Олохтоохтор ирдэбиллэри барытын тутуһаллар, маҕаһыыннарга, уопсастыбаннай сирдэргэ мааска, бэрчээкки кэтэллэр. Дьаһалта сэрэтэр үлэни ыытар.
edersaas.ru