«Саха» НКИХ «Талбан» биэриигэ хоруона хамсыгын туһунан кэпсэтии салҕанар. Икки күн устатыгар Муома улууһуттан элбэх ыйытыы киирдэ.
Муоматтан «Улууска соҕотох аптека баар. Эминэн хааччыллыыта бу ыарыы кэмигэр мөлтөх буолла. Чугас дэриэбинэлэри этэ да барбаккын. Мантан (Дьокуускайтан) хааччылла олороллор. Норуот эмэ-томо суох сылдьан ыалдьар буолла» диэн ыйыттылар.
Бу ыйытыыга улуус баһылыга Иван Павлов маннык хоруйдаата:
—Биһиги улууспутугар, Хонууга, биир муниципальнай аптекалаахпыт үлэлии турар. Атын нэһилиэктэргэ ФАПтары кытта аптека дуогабарынан, суол сабыллыан иннинэ, сөптөөх эмп-том, мааска ыытыллыбыта. Билигин өрүспүт тура илик. Инньэ гынан, суолбут-ииспит билиҥҥитэ суох.
Бу ыарыыны биһиги сүрдээҕин утарсан олордубут. Уоппускаҕа сылдьыбыт дьон бары анаалыстарын туттаран, ыспыраапкаланан, ирдэбили барытын тутуспуттара. Онон дьоммор-сэргэбэр бу ыарыы Муома оройуонугар балай да өр кэмҥэ кэлбэккэ турбутугар махтаныахпын баҕарабын.
Ол гынан баран, хомойуох иһин син биир кэллэ. Бүгүҥҥү күҥҥэ бигэргэтиллибитинэн 20 киһи ыалдьыбыта бэлиэтэнэр. Алта нэһилиэктэн икки нэһилиэкпитигэр, Соболооххо уонна Хонууга бу ыарыы турда. Сыстыганнаах ыарыы Саха сиригэр кэлиэҕиттэн, уопсайа, ПЦР 236 киһи, ИФА 400 киһи анаалыс туттарбыта. Бүгүҥҥү күҥҥэ 20 киһи бигэргэтиллибит буоллаҕына, атыттар анаалыстара билиҥҥитэ этэҥҥэ.
Эминэн-томунан сайын эрдэ хааччыммыппыт. Дьон уоскуйбут курдук буолбута. Эмп-томп барыта баар этэ. Онтон бу, быһа барыллаан, икки нэдиэлэ анараа өттүгэр, дьаҥтан дьон куттананнар, долгуйаннар, эми сүрдээҕин атыылаһан бүтэрэн кэбистилэр. Ол гынан баран, бүгүҥҥү күҥҥэ сүрүн эмтэрбит саппаастара аптекаҕа баар. Суһал ыстаапка барытын быһааран суруйа олоробун. Улууска батсаап бөлөхтөргө барытын тиэрдэн иһэбин. Эминэн-томунан Дьокуускайтан уонна Новосибирскайтан улахан фирмалар хааччыйаллар. Биһиги сайаапкабытын, харчыбытын барытын ыытан олоробут. Поставщиктар эмп киириитинэн көрөн ыытан иһэллэр. Бу бээтинсэҕэ сорох эмп Дьокуускайтан эбии кэлиэхтээх. Аны туран, сөмөлүөт нэдиэлэҕэ иккитэ эрэ, бэнидиэнньиккэ уонна бээтинсэҕэ эрэ көтөр. Онон наһаа улахан арыттардаах, бириэмэ бөҕө барар.
Биһиги санавиацияны Орто Халыматтан сакаастыыбыт. Куһаҕана суохтук үлэлиир. Соболоохтон Хонууга икки кырдьаҕаһы аҕалан балыыһаҕа укпуппут, онон икки суһал рейс оҥоһуллубута.