Бүгүн, сэтинньи 11 күнүгэр, «Саха» НКИХ ханаалын «Талбан» биэриитигэр коронавирус дьаҥын, эмп тарҕаныытын тула кэпсэтиилэр салҕаннылар. Эпииргэ СӨ Доруобуйа харыстабылыгар министиэристибэтин эминэн хааччыйыы отдел салайааччыта Анастасия Эверстова ыйытыыларга хоруйдаата.
Эпииргэ үгүс ыйытыы коронавируска сутуллубут дьону эминэн босхо хааччыйыы туһунан буолла. Анастасия Эверстова маннык хоруйдаата:
— Доруобуйа харыстабылын министиэристибэтэ эминэн хааччыйыыга кулун тутар ыйтан үлэлиир. Резервнэй пуондаттан 69 мөлүйүөн солкуобай көрүллэн, тустаах эмтэр атыылаһыллыбыттара. Оттон дьиэҕэ эмтэнэр дьоҥҥо анаан 9 мөлүйүөн солкуобайтан тахса суумаҕа эмп балаҕан ыйыгар атыылаһыллан тарҕатыллыбыта.
Билиҥҥи дааннайдарынан, барыта 8100 киһи босхо эми туһаммыт. Билигин эмиэ эмп атыылаһыллан, 5 тыһыынча киһиэхэ тарҕаныахтаах.
Босхо эми коронавирус дьаҥынан чопчу ыалдьыбыт, лабораторнай чинчийиинэн бигэргэтиллибит ыарыылаах, ону сэргэ быраас эми ырысыаптаан суруйбут дьоно эрэ туһанар кыахтаахтар.
Эпиир кэмигэр көрөөччүлэр кыттыстылар. «Мин коронавирустаабытым, дьиэттэн эмтэнэбин. Эми быраас батсаабынан суруйан ыыппыта, ырысыап биэрбэтэҕэ. Ону бэйэм харчыбынан атыыласпытым, харчыбын төнүннэриэхпин сөп дуо?» — диэн көрөөччү ыйытта.
Маныаха министиэристибэ үлэһитэ: «Эми быраас ырысыабынан атыыласпыт, итиэннэ аптека чиэгин сүтэрбэтэх буоллаххытына, кэлэр сылга»налоговай вычет» оҥотторуоххутун сөп. Ырысыап бэриллибэтэх буоллаҕына, бырааска кыһалҕаны быһааран, суруйан биэрэригэр этиҥ», — диэн хоруйдаата.
edersaas.ru