«Саха» НКИХ «Талбан» биэриитэ бүгүн иккис күнүн коронавирус дьаҥын туһунан биэрии бара турар.
edersaas.ru
«Бүгүн улуус баһылыктарын сэрэттибит. Онон улуустартан киирбит боппуруостарга тута хоруйу биэриэхпит», — диэн ыытааччы Талбан көрөөччүлэри сэрэттэ.
Дьон ыйытыыта араас. Онно өрөспүүбүлүкэтээҕи клиническэй балыыһа инфекционист бырааһа Наталья Портнягина тустаах хоруйдары биэрдэ. Бүгүҥҥү тиэмэ — сибикитэ суох ыалдьыы, волонтердар үлэлэрэ уонна эмп сыаната.
— Амтаны, сыты билбэт буолуу — киһи коронавируһунан сутуллуутун биир көрүҥэ. Киһи олох доруобай сылдьан анаалыс туттардаҕына, «положительнай» диэн түмүгү ылыан сөп. Дьиэ иһигэр биир эмит киһи ыарыйдаҕына, дьиэ кэргэн бары ыалдьымыахтарын сөп. Иммунитета күүстээх киһи дьаҥҥа бэриммэт түбэлтэтэ баар, — диэн бэлиэтээтэ эмчит.
«ИФА уонна ПЦР туох атыннаахтарый?» диэн ыйытыыга Наталья Портнягина: «ПЦР — вирус баарын билии. Бастакы нэдиэлэҕэ муруҥҥуттан уонна айаххыттан ылыллар анаалыс. ИФА — иммунитет туругун бэрэбиэркэлээһин. «Антитела» үөскээбитин билиигэ дьонтон тымырдарыттан хаан ылаллар», — диэн хоруйдаата.
Маны сэргэ быһа эпииргэ Усуйаана уонна Эдьигээн улууһун баһылыктара кыттыыны ыллылар.
Елена ПОТОЦКАЯ, «Саха сирэ» хаһыат, edersaаs.ru
Хаартыска — ааптар түһэриитэ.