«Талбан» биэриигэ: Өлүөнэ өрүс уутун таһыма намтаабыта кутталы үөскэтэр дуо?
«МИНИСТР» дьыалабыай оонньуу туһунан урукку сылларга кыттыбыт Алексей Иннокентьев уонна быйылгы оонньуу финалиһа Петр Яковлев «Талбан» биэриигэ ыалдьыттаан, оонньуу хаамыытын, сыалын-соругун, бэйэлэрин санааларын, түһүмэхтэр тустарынан ырытыыга кыттыстылар, бэйэлэрин санааларын үллэһиннилэр .
Өрөспүүбүлүкэ олохтоохторун улаханнык долгуппут Өлүөнэ өрүс уутун таһыма аһары түһүүтүн тула ырытыы буолла. 2019 сыл атырдьах ыйын 20 күнүгэр Өлүөнэ өрүс уутун таһымын муҥутаан түспүт кээмэйэ -240 см-га тэҥнэспит. 2015 сыллаахха бу көрдөрүү -205 см буола сылдьыбыт. Бу хартыына сэттис сылын хатыланар, өссө хас сыл устата салҕанара биллибэт. Уулаах дьыл кэлиэхтээҕин, ол эрээри хаһан буолара биллибэтин туһунан инженер-гидролог Алена Неустроева чинчийии көрдөрүүлэринэн кэпсээтэ.
Нэһилиэнньэ олоҕор куттал суох буолуутун хааччыйар судаарыстыбаннай кэмитиэт бэрэссэдээтэлин бастакы солбуйааччы Иннокентий Андросов уу таһымын түһүүтэ төһө кутталлааҕын, тулалыыр эйгэҕэ төһө улахан охсуулааҕын туһунан нэһилиэнньэни долгутар ыйытыктарга эппиэтээтэ.
Ону тэҥэ «Талбан» биэриигэ: Марина Кобельянова Сунтаар улууһун сонуннарын тиэртэ, улууска туох, ханнык саҥа тутуу үлэтэ бара турарын кэпсээтэ, Мииринэй оройуонун уонна Сунтаар улууһун ыччатын форумун туһунан сырдатта. Сербияҕа олорор биир дойдулаахтарбыт, урбаанньыт Анастасия Лугинова Вика Караджич диэн суруйааччыга аналлаах тэрээһиҥҥэ сахалар кыттыбыттарын туһунан иһитиннэрдэ.
Биэриини манна көрүҥ:
nvk-online.ru сайтан.
#саха_нких_сонуннара