Үүнүөххүн-сайдыаххын, бэйэҥ кыаххын билиэххин баҕарар буоллаххына, «Саха сирин талааннара» өрөспүүбүлүкэтээҕи каадырдары түмэр бырайыак балаҕан ыйын 27 күнүттэн алтынньы 26 күнүгэр куонкуруска ыҥырар.
edersaas.ru
Тэрээһини СӨ Ил Дарханын инновационнай менеджмеҥҥэ үрдүкү оскуолата уонна СӨ ыччат дьыалатыгар уонна социальнай коммуникацияҕа миниистиэристибэтэ көҕүлээн, иилээн-саҕалаан ыытар.
«Саха сирин талааннара» куонкурус 300 финалиһа «LAB.TALENT» бырагыраамаҕа үөрэниэхтэрэ. Оттон 10 кыайыылаах киһи аан дойду, Арассыыйа бастыҥ үөрэх тэрилтэтигэр үөрэнэргэ грант ылыахтара, итиэннэ Саха өрөспүүбүлүкэтин каадырдарын резервэтигэр киириэхтэрэ.
Кыттааччы 18-тан 45-гэр дылы саастаах буолуохтаах. Устудьуоннар, эдэр исписэлиистэр, салайааччы ыччат кыттыыны ылыан сөп.
Бырайыак тугу ирдиир?
Кыттааччылар 5 түһүмэҕи ааһаллар. Хас биирдии түһүмэх үөрэтэр аналлаах. Кыттыбыт ыччат бэйэтин күүһүгэр эрэллээх, дьоҕурун арыйан, быдан сайдан тахсыаҕа диэн тэрийээччилэр эрэнэрэллэр.
Куонкурус дистанционнай киэбинэн барыаҕа. Онон ыраах да сытар улуустан кыттар кыах бэриллэр.
Санатар буоллахха, бу тэрээһин уруккута «Миниистир» дьыалабыай оонньуу саҥардыллыбыт көрүҥэ буолар. Былырыын бэс ыйын 14 күнүгэр Ил Дархан Айсен Николаев “Миниистир” («Молодежь – инновационно-стратегический ресурс развития Республики Саха (Якутия)») дьыалабыай оонньууга уларыйыылар киирэллэрин туһунан ыйаахха илии баттаабыта. Манна ыйылларынан, 2019 сылтан Сомоҕолоһуу сылын чэрчитинэн дьыалабыай оонньуу саҥардыллыбыт форматынан ыытыллар диэн. Оонньуу сүрүн сыалынан үөрэнээччилэр, устудьуоннар, эдэр исписэлиистэр уонна салайааччылар лиидэрдии хаачыстыбаларын быһааран, Саха сирин социальнай, экэнэмиичэскэй сайдыытыгар сөпкө туһаналларын ыйыы-кэрдии буолар.
Бырайыак туһунан сиһилии социальнай ситимнэргэ баар «Таланты Якутии» сирэйгэ уонна komanda.sakha.gov.ru саайтка ааҕыҥ.
#ОнестьуКаждого #ТалантыЯкутии
Ирина Ханды, “Саха сирэ” хаһыат, edersaas.ru