Талааннаах мусукаан Петр Колодезников

Ааптар: 
Бөлөххө киир:

Баян  тыаһын кытары Петр Петрович мөссүөнэ көстөн кэлэргэ дылы. Муусука алыбар ылларбыт, истиҥ иэйиигэ куустарбыт мусукаан, мындыр салайааччы, айылҕаттан айдарыылаах талааннаах киһи Петр Петрович Колодезников быйыл төрөөбүтэ 70 сылын туолла.

edersaas.ru

СӨ култууратын туйгуна, мелодист, аккомпаниатор, аранжировщик П.П.Колодезников тохсунньу 13 күнүгэр 1949 с. Томпо улууһугар Мэҥэ Алдан сэлиэнньэтигэр төрөөбүтэ. Эһэтэ Михаил Петрович Колодезников, бэл, саҥа кэлбит аныгы тиэхиньикэни таҥар мындыр уус, олоҥхоһут, отоһут этэ. Аҕата Петр Михайлович — СӨ үтүөлээх учуутала, ырыаһыт бэрдэ, баяҥҥа оонньуура. Онон Петр идэтин таларыгар туох да саарбахтааһын суоҕа, олоҕун муусукаҕа анаабыта. 1972 сыллаахха Дьокуускай куораттааҕы муусука училищетын бүтэрээт, дойдутугар үлэлии кэлбитэ. Мэҥэ Алдан уус-уран самодеятельноһа саҥалыы тыыны ылбыта. Баяҥҥа доҕуһуоллуура, ВИА тэрийбитэ, оҕолору дьарыктаабыта. Оҕо муусукаҕа оскуолатын аһары ситиспитэ.

Кини доҕуһуолунан ыллаабыт киһиэхэ барытыгар умнуллубат өйдөбүл хаалара. Оннук ураты ыраастык оонньуура, ырыаһыты көҕүлээн биэрэрэ, көмөлөһөрө. Бастаан миигин ыллатарыгар биллибэтинэн, тональноспын көрдөөн, үрдэтэн испит эбит. Кини хайдах оонньуурунан мин ыллаан эйээрэн испитим. Бэйэтэ эппитигэр биирдэ өйдөөн күлсүбүппүт. Кэнсиэрдэри, тэрээһиннэри ыытар буоламмын ыллаабат этим. Биир үтүө күн миигин ыллатаары ырыа анаан суруйан аҕалбыта. Бэйэм эрэ ыллыыр, аргыс буолар “Үчүгэй даҕаны күн үүммүт” диэн ырыаланан хаалбытым, ааттыын да үчүгэйкээн ырыа. «Кыайыы күнүн уруйдуу» уонна «Дьиэрэй, ырыам» хоһооннорбун ырыа гынан көтүппүтэ.

1993 сыллаахха фольклор кылааһын аһабын диэн миигин ыҥыран ылбыта, толкуйдуу барбакка тута сөбүлэспитим. Баҕалаах оҕолору барыларын ылан дьарыктаан барбытым. Уруоктарбытын киирэн көрөрө, былааннарбытын ирдиирэ, хас чиэппэр аайы педсовет буолара, ситиһиилэри кытары туох кыаллыбатын ырытан кэпсэтэрбит. Дириэктэр быһыытынан олус ирдэбиллээх, үлэһиттэригэр истиҥник, инникитин толкуйдаан сыһыаннаһар мындыр салайааччы этэ. Үрдүк култууралаах, сымнаҕас майгылаах, көнө, чэбэр киһи этэ. Хаһан даҕаны мөҕөн-этэн, киһини самнаран саҥарбатаҕа, хата хайҕыыра, үлэһиттэрин куруутун өйүүр, өйдүүр уонна элбэхтик сүбэлиир-амалыыр буолара, аҕыйах тылынан бэргэнник этэн кэбиһэри, быһаарары сатыыра. Кини курдук салайааччыны көрсө иликпин.

«Ньургун Боотур» муусуканан испэктээк туруорарбытыгар муусукатын таҥан, көстүүмнэргэ харчы көрдөрөн, туох кыаллыбатын барытын көннөрөн, көрдөрөн биэрбитэ.

Муусука оскуолата саҥа дьиэтин бэйэтэ суоттаан уларытан-тэлэритэн, оҕо дьарыктанарыгар сөптөөх гына кэбиниэттэргэ арааран, оҥорбута. Бары көмөлөөн тупсарбыппыт, обуойдаан, кырааскалаан. Петр Петрович тэбис-тэҥҥэ сылдьыһара. Көрө сылдьан барытын көннөрөрө. Кини сатаабата диэн суоҕа: сантехника, электричество, кырааскалааһын, ханаппаакы…

Петр Петрович тэлбит суолун оҕолоро, үөрэнээччилэрэ салгыыллар. Оскуолата тигинэччи үлэлиир, бастыҥнар ортолоругар баар, кини аатын чиэстэээхтик өрө тутан айаллар-туталлар.

Вера Гоголева-Айылык, СӨ үөрэҕириитин туйгуна,

«Норуот айымньытын сайыннарыыга кылаатын иһин» Бочуотунай бэлиэлээх.

+1
0
+1
0
+1
0
+1
0
+1
0
+1
0
+1
0