Муус устар 6 күнүгэр өрөспүүбүлүкэтээҕи медиакииҥҥэ “В нашем волшебном мире” диэн кинигэ сүрэхтэниитэ буолла.
Бу кырачааннарга аналлаах остуоруйалары Валерия Аммосова диэн талааннаах кыысчаан суруйбут, уруһуйдарын эмиэ эдэркээн Полина Славинская уруһуйдаабыт. Аһымал аахсыйаҕа “Якутия” медиахолдинг кыттыһан, кинигэни босхо бэчээттээн таһаарбыт.
Остуоруйаларга единорог курдук аптаах кыыллар бааллар эрээри, бу — дьон сыһыаннаһыытын, биһиги олохпут туһунан кэпсээннэр. Валерия остуоруйалары былырыыҥҥыттан ыла суруйар буолбут. Кинини аан бастаан учуутала Ираида Иннокентьевна, инклюзивнай үҥкүү ансаамбылын уһуйааччыта Арина Васильева өйөөбүттэр. Онон 2020 сыл ахсынньытыгар “Космическое чудо” диэн бастакы кинигэтэ тахсыбыт эбит. Үҥкүүлүүрүн таһынан, Валерия “Солнечный мир” оҕо киинигэр дьарыктанар. Инбэлииттэри үөрэтэр техникумҥа “ЭВМ оператора” идэни баһылаабыт.
Оттон Полина 3 сааһыттан уруһуйдуур, мультипликационнай анимациянан дьарыктанар. «Чудеса кино» бэстибээлгэ кыайан, мультиктары уруһуйдуур аппаратураны ылбыт эбит. Инникитин мультипликатор үөрэҕэр киирэр былааннаах.
Кинигэ эрэдээктэрэ Анна Пшенникова бары көмөлөспүт дьоҥҥо, быйыл тэриллибитэ 160 сылын туолар “Якутия” медиахолдиҥҥа уонна “Сахамедиа” холдиҥҥа махтанна.
Москваттан “Лучики света” ДЦП-лаах уонна ньиэрбэ ыарахан ыарыылаах оҕолорго көмөлөһөр кулууп салайааччыта, суруналыыс Вероника Чупрова тэрээһиҥҥэ быһа эпииринэн холбонно.
— Бу олус улахан социальнай суолталаах бырайыак. Доруобуйаларыгар хааччахтаах оҕолор талааннарын арыйалларыгар туох да хааччах суох диэн итэҕэтиэхтээхпит, кинилэр саҥа үктэлгэ тахсалларыгар көмөлөһүөхтээхпит. Хас биирдии көмөлөспүт киһи дууһатыгар үтүө санаа үксүүр. Ол иһин үс ыйдааҕыта Валерия ийэтэ Туйаара Дьячковская биһиэхэ тахсан кинигэ таһаарар туһунан идиэйэтин эппитигэр, үгүс тыла суох өйөөбүппүт. Дойду үрдүнэн талааннаах оҕолору булан, көмөлөһө туруохпут, — диэн кини эттэ.
Валерияны уонна Полинаны дьоһун ситиһиилэринэн учууталлара, уһуйааччылара кэлэн эҕэрдэлээбиттэрэ, сибэкки дьөрбөтүн туттарбыттара олус истиҥ буолла.
Ангелина Васильева, “Саха сирэ” хаһыат, edersaas.ru
Хаартыска: СИА.