Сериаллар сюжеттарыттан итэҕэһэ суох кутталлаах чахчылар дьиҥ олоххо эмиэ буолаллар.
Муус устар ый бүтүүтүгэр Дьокуускай куорат кытыытын биир оройуонугар талааһын тахсыбыт.
Полицияҕа эрийбит эмсэҕэлээччи эппитинэн, кини такси ыҥырбыт. Арай ол айаннаан истэхтэринэ, суоппар бэстилиэт ойутан таһааран, кинини төбөҕө тирээн туран, суотабай төлөпүөнүн уонна харчытын биэрэригэр модьуйбут. Өлөрбөккө, ыыппытыгар махтал.
Уорбаланааччы уонна кини массыынатын туһунан оперативнай ориентировка тутатына полиция уонна Росгвардия бары нэрээттэригэр бэриллибит.
Киэһэ өттүгэр патруллуу сылдьыбыт Росгвардия харабыллааһыҥҥа отделын полицейскайдара ол ориентировкаҕа сөп түбэһэр иномарканы көрбүттэр. Уруулга 25 саастаах кэлии омук киһитэ олорор эбит.
Росгвардеецтар уорбаланааччыны тутан баран, полиция суһал-силиэстийэлиир бөлөҕүн ыҥырбыттар. Бу киһиттэн пневматическай бэстилиэти уонна уоруллубут төлөпүөнү булбуттар.
Урут сууттана сылдьыбатах, ханна да үлэлээбэт уорбаланааччыга «Талааһын» ыстатыйанан холуобунай дьыала тэриллибит. Уорбаланааччы хаайыллыбыт.
Бу туһунан РФ Росгвардиятын Саха сиринээҕи управлениетын уонна СӨ ИДьМ-тын пресс-сулууспалара иһитиннэрдилэр.
Биһиги корр., «Саха сирэ» хаһыат, edersaas.ru
Хаартыска: интэриниэттэн.