Тутарга эрэ буолбакка, кини кэмигэр бэлиэтии көрөн, күүһүлээччи ыар буруйун тиһэҕэр тиэрдибэтэх.
Вера МАКАРОВА, «Саха сирэ» хаһыат, https://edersaas.ru/
Сарсыарда киһиэхэ ыраас, сырдык эрэ санаалар баһыйыахтаахтара эбитэ буолуо эрээри, күн да тахсыыта буруйу оҥоруу элбэхтэ тахсааччы.
Бу быһылаан Дьокуускай куоракка кулун тутар 12 күнүн сарсыардатыгар буолбута. Сэбиэскэй Армия 50 сыла уулуссатыгар, суол кытыытыгар («Сахабулт» маҕаһыынын утарыта) биир итирик киһи дьиэтигэр баран иһэр кыыска саба түһэн, күүһүлээри туора сиргэ соспут.
Ити кэмҥэ кыыс хаһыытын ааһан испит такси суоппара истибит уонна хаһыы кэлэр сирин диэки салайбыт. Онно биир киһи кыыһы сосуһа сылдьарын, тардыалаһарын көрөн, ол диэки барбыт.
Массыына чугаһаан иһэрин көрөн, бөрөстүүпүнньүк атахха биллэрбит. Такси суоппара кинини кэнниттэн эккирэппит да сиппэтэх, тута полицияҕа тыллаан, уорбаланааччы тас көрүҥүн ойуулаан биэрбит.
Эмсэҕэлээбит кыыс «суһал көмөҕө» эрийбит.
Тутуллубут уорбаланааччы — Горнай улууһуттан төрүттээх 32 саастаах, урут итинник буруйу оҥорон хаста да сууттана сылдьыбыт киһи.
Бу чахчынан РФ Холуобунай кодексатын 131-с ыст. 1 чааһынан — 30-с ыст. 3-с чааһынан (күүһүлүүргэ сорунуу) холуобунай дьыала тэриллэн силиэстийэлэнэр.
Бу ыар буруй сарсыарда 06 ч. 15 мүн. — 06 час. 45 мүн. оҥоһуллубут. Эмсэҕэлээччи көрдөрбүтүнэн, ити кэмҥэ уулуссанан 15 кэриҥэ массыына ааспыт.
Итинэн сибээстээн, видеорегистратор көмөтүнэн ол массыыналары быһаарыахтара.
Итиэннэ силиэдэбэтэл көрбүт дьону бу нүөмэрдэргэ эрийэн биллэрэргитигэр көрдөһөр: 8-914-268-77-27, 8 (4112) 34-15-62, 8 (4112) 43-92-91 биитэр бу аадырыска кэлэргитигэр: Дьокуускай куорат, Короленко, уул. 2-тэ, 209-с кабинет эбэтэр Якутская уул. 2-тэ, 309-с кабинет.
Инньэ гынан, туох эрэ бөрүкүтэ суоҕу өйдөөн көрбүт суоппар ааһа турбакка, киһилии хорсун быһыытын көрдөрөн, кыыһы быыһаан, буруйдааҕы булларан, улахан көмөнү оҥордо.
Вера МАКАРОВА, «Саха сирэ» хаһыат, https://edersaas.ru/
Хаартыска: Росгвардия управлениетын пресс-сулууспата.