Бу дьыала туһунан биһиги сайтпытыгар былырыын, 2017 сыл ыам ыйын 24 күнүгэр, суруйбуппут. 32 саастаах Айаал Николаев өлүгүн ыам ыйын 23 күнүгэр Дьокуускай куорат таһынааҕы Газовиктар бөһүөлэктэрин 27 №-дээх дьиэтин таһыгар ити дьиэҕэ олорор киһи булбут этэ.
Өлөрүүгэ уорбаланааччылары — Өлүөхүмэттэн төрүттээх 22 уонна 23 саастаах урут сууттана сылдьыбатах урдустары — СӨ ИДьМ-тын холуобунай ирдэбилин уонна Дьокуускай куорат полициятын оперативниктара туппуттара.
СӨ Борокуратууратын пресс-сулууспата иһитиннэрбитинэн, бу айдааннаах дьыалаҕа СӨ Үрдүкү суутун бириигэбэрэ тахсыбыт.
Суут быһаарбытынан, 2017 сыл ыам ыйын 22 күнүгэр Чудинов Пшенниковтыын дьиэҕэ арыгылаан баран, такси сакаастаабыттар. Такси кэлэн, ыйбыт аадырыстарыгар тиэрдибитин кэнниттэн, харчыларын төлөөмөөрү, Чудинов суоппары моойго быһаҕынан анньан, миэстэтигэр өлөрбүт. Ол кэнниттэн өлүгү иккиэн массыынаттан соһон таһааран, уулуссаҕа хаалларбыттар.
Салгыы таксист массыынатын күрэтэн, онно баар маллартан уоран баран, оҥорбут буруйдарын суолун-ииһин кистээн, Чудинов массыынаны уматан кэбиспит.
Санатар буоллахха, дьыала тэриллээтин, өлүөхсүт «Тойота Корона» массыынатын өлүк көстүбүтэ биир чаас буолбутун кэнниттэн Чернышевскай уулусса оройуонуттан булбуттара.
Суут мунньаҕар сууттанааччылар көрдөрүү биэрэртэн аккаастаммыттар.
Ол да буоллар, оҥорбут ыар буруйдара дакаастанан, Чудинов 16 сылга кытаанах эрэсиимнээх холуонньаҕа көҥүлэ быһыллыбыт. Онтон Пшенников буруйу кистээһиҥҥэ, массыынаны күрэтиигэ уонна уорууга буруйдааҕынан билиниллэн, 3 сыл 6 ыйга уопсай эрэсиимнээх холуонньаҕа көҥүлэ быһыллыбыт.
Биһиги корр., «Саха сирэ» хаһыат, edersaas.ru
Хаартыскаларга: хаҥастан уҥа — Чудинов, уҥа — Пшенников.
Хаартыскалар интэриниэттэн ылылыннылар.