Бэҕэһээ, ыам ыйын 23 күнүгэр, Дьокуускай куорат таһынааҕы Газовиктар бөһүөлэктэрин 27 №-дээх дьиэтин таһыгар эдэр киһи өлүгэ көстүбүтэ. Өлүгү ити дьиэҕэ олорор киһи булбут.
Вера МАКАРОВА, «Саха сирэ» хаһыат, edersaas.ru
Бу чахчынан силиэстийэ уорганнара «Киһини соруйан өлөрүү» ыстатыйанан холуобунай дьыала тэрийбиттэрэ. 32 саастаах саха киһитин сүрэххэ быһаҕынан анньыбыттар.
Өлүк көстүбүтэ биир чаас буолбутун кэнниттэн, өлүөхсүт «Тойота Корона» массыынатын Чернышевскай уулусса оройуонуттан булбуттар — уоттуу сатаабыттар.
Өлүөхсүт бүтэһигин сибээскэ ыам ыйын 22 күнүн киэһэтигэр тахса сылдьыбыт. Бу өлөрүүгэ уорбаланааччыны (уорбаланааччылары) полиция оперативниктара көрдүүллэр.
News.Ykt.Ru сайт суруйбутунан, өлбүт киһи — Айаал Николаев, 1985 сыллаах төрүөх, 9 саастаах кыыс тапталлаах аҕата, ойоҕо иккис оҕотунан хат, ипотеканан ылбыт дьиэлээхтэр, дьонун соҕотоҕун иитэн олорбут.
Бэҕэһээ киин куорат Комсомольскай болуоссатыгар такси сулууспаларын суоппардара мустан, Айаал дьонун кытта көрсүбүттэр, харчы хомуйан көмөлөспүттэр.
Аймахтара Дьокуускай куорат олохтоохторуттан көрдөһөллөр: уолу дойдутугар таһаарарга «УАЗ» массыына наада итиэннэ ким баҕалаах, бука диэн, Сбербаан 4276 7600 5130 9407 нүөмэрдээх каартатыгар, SARGYLANA KUGASOVA аатыгар (өлүөхсүт кэргэнэ) төһө кыалларынан харчы уган көмөлөһөргүтүгэр.
Вера МАКАРОВА, «Саха сирэ» хаһыат, edersaas.ru
Хаартыска: РФ СК Саха сиринээҕи управлениета уонна социальнай ситимтэн.